75-годдзю ўтварэння Гродзенскай вобласці прысвяцілі сённяшняе рэгіянальнае свята “Ліпнішкаўскі сенакосы” супрацоўнікі аддзела культурна-масавай і асветніцкай работы аграгарадка Ліпнішкі. Мы крышку не так сказалі. Гэтае яркае, звонкае, неверагоднае па сваіх творчых задумках мерапрыемства праводзіцца ўжо некалькі гадоў. І амаль адразу выйшла з рамак рэгіянальнага. Стала адным з раённых брэндавых праектаў, у якім з задавальненнм прымаюць удзел жыхары суседніх раёнаў. Між іншым, не толькі творчыя калектывы, але і галоўныя героі святочнага дзейства касцы прыязджаюць да нас штогод з Воранаўскага, Лідскага, Карэліцкага раёнаў. Сёлета гасцей гэтых няма. Так здарылася, што сёння і ў Лідскім раёне такое ж свята. Трэба і лідчан падтрымаць.
…Ідуць касцы, звіняць іх косы,
Вітаюць іх буйныя росы,
А краскі ніжай гнуць галовы,
Пачуўшы косак звон сталёвы...
Росы ў гэтыя дні не вітаюць касцоў у Ліпнішках. Стаіць зусім не чэрвеньская спякота. І відовішча пачалася ж не на світанні (менавіта да ўзыходу сонца некалі выходзілі на пакосы мужчыны). Свята пачалося а чацвёртай гадзіне дня, надвячоркам, калі сонца разыйшлося ў сваёй няшчаднай цеплыні, а травы, яшчэ і не скошаныя, ужо пачалі пахнуць сенам.
Традыцыйна шмат гледачоў і шмат удзельнікаў зараз знаходзяцца ў парку мікрараёна сельгастэхнікі.
Гучыць музыка, песні, частушкі, жарты, адбіваюць абцасы ў танцах Галоўную цікаўнасць, безумоўна, выклікаў адкрыты рэгіянальны конкурс па ручному сенакашэнню. Між іншым, прынялі ў ім удзел не толькі мужчыны, але і самыя смелыя, рызыкоўныя кабеты. Толькі мільгацела каса-літоўка ў іх руках. Свята яшчэ назаве крыху пазней пераможцу, “Касца 2019”.
А зараз працягваюцца канцэртныя выступленні калектываў аматарскай творчасці Іўеўскага раёна. Затым пройдзе дэфіле - шоу “Доўгая каса - дзявочая краса”;
гульнёвая праграма “Сенакосная пара” аддзела культурна-масавай і асветніцкай работы аг.Суботнікі; эстрадны канцэрт салістаў аддзела культурна-масавай і асветніцкай работы аграгарадка Ліпнішкі, дансінг-шоў праграма “Танцы на пракосе”.
На працягу свята працуюць: майстэрня “Касца-удальца”; падворкі “Сялянскія прысмакі”; майстар-класы па пляценню вянкоў “Вянок-вяночак”; па вырабу лялек “Траўніца”; гандлёвыя палаткі; дзіцячыя атракцыёны; выстаўкі-продажу вырабаў дэкаратыўна-прыкладной творчасці.
Госці маюць магчымасць частавацца юшкай і шашлыкамі.
В. ГУЛІДАВА.
Фота Д. ЗЯНКЕВІЧА.