Свята апошняга званка ў Шаркаўшчынскай СШ №2
Тысячы званкоў змясцілі ў сябе школьныя гады. Ніводны з іх не быў падобны на другі. Адзін прыспешваў на ўрок, іншы зваў да любімага настаўніка, быў нават такі, які выручаў у цяжкі момант, калі цябе выклікалі да дошкі, а ісці да яе не вельмі хацелася. Былі зусім недарэчныя званкі падчас кантрольнай работы, калі ўсё амаль ужо атрымалася, але трэба здаваць сшытак. Між іншым, былі і такія жаданыя, не параўнальныя ні з чым званкі ў завяршэнні навучальнага дня, чвэрці, года. Здавалася, што ім не будзе канца. Але вось прыйшоў час і апошняга званка.
Дзень развітання з дзяцінствам. Так, напэўна, можна назваць апошні званок. Кожны дарослы памятае ўрачыстую лінейку, прыгожа, з густам апранутых выпускнікоў і крыху разгубленых бацькоў, якім цяжка было паверыць, што іх дзеці ўжо дарослыя.
30 мая для 22 выпускнікоў сярэдняй школы № 2 свята апошняга званка — асаблівы дзень. Адзінаццаць год праляцелі хутка. У мінулым засталося мноства вялікіх і малых адкрыццяў, з якіх і складалася школьнае жыццё.
— Заканчэнне школы — гэта важны рубеж у жыцці, — сказаў у сваёй прамове старшыня райвыканкама Дзмітрый Міхайлавіч Ламака. — Сёння ва ўстановах адукацыі раёна выпускнікамі з’яўляюцца 149 вучняў дзявятых і 114 вучняў адзінаццатых класаў. Паважаныя выпускнікі, вы стаіце на парозе самастойнага дарослага жыцця. Наперадзе — адказная пара, калі вы будзеце здаваць экзамены, выбіраць прафесію і вызначаць свой далейшы лёс. Будзьце смелымі і ўпэўненымі ў сабе, не скарайцеся перад цяжкасцямі, актыўна праяўляйце свае таленты. Ад вашай мэтанакіраванасці залежыць ваша будучыня і будучыня нашай краіны. Віншую з гэтым выдатным святам і вас, паважаныя настаўнікі! Дзякуй вам за прафесіяналізм, творчую працу, адданасць прафесіі і вялікую любоў да дзяцей. Паважаныя бацькі! Сённяшняе свята — гэта вынік доўгіх і складаных школьных год, якія вы прайшлі разам з дзецьмі. Радасць адкрыццяў і горыч памылак, шчасце і першае каханне — усё гэта вы перажылі ў сваіх сэрцах. Няхай для вашых дзяцей ваш бацькоўскі дом заўсёды застаецца адкрытым. Усім астатнім вучням жадаю шмат радасных эмоцый і яркіх уражанняў падчас летніх канікул. Запасайцеся здароўем і энергіяй на будучы навучальны год.
Дзмітрый Міхайлавіч у якасці падарунка ўручыў дырэктару школы сертыфікат на набыццё спартыўнага інвентару для фізічнага выхавання вучняў.
Затым да настаўнікаў, вучняў і іх бацькоў звярнуўся дырэктар школы Андрэй Іванавіч Татаровіч:
— Сёння ва ўсіх нас доўгачаканае свята. Мы ўрачыста завяршаем чарговы навучальны год. Паважаныя выпускнікі, апошні школьны званок абвясціць вам пра заканчэнне дзяцінства і пачатак новага самастойнага жыцця. Заўсёды ўпэўненым крокам ідзіце па выбранай вамі дарозе. Няхай тыя веды, якія кожны з вас атрымаў у сценах роднай школы, стануць трывалым падмуркам для будучых прафесій. Памятайце, што мы, настаўнікі, будзем чакаць вас у навучальнай установе, дзверы якой гасцінна расчынены.
Андрэй Іванавіч, падводзячы вынікі навучальнага года, адзначыў тых вучняў, якія вызначыліся паспяховасцю ў вучобе і паводзінах, прымалі актыўны ўдзел у школьным жыцці, сталі пераможцамі прадметных алімпіяд, творчых конкурсаў, спартыўных спаборніцтваў. Хлопчыкі і дзяўчынкі атрымалі з рук дырэктара граматы і дыпломы.
У апошні час вельмі папулярным стала правядзенне на такіх мерапрыемствах флэш-мобаў. Выпускнікі сярэдняй школы № 2 выканалі музычна-танцавальную кампазіцыю з элементамі сучаснай харэаграфіі. Гэтым самым яны прадэманстравалі сваю любоў да школы, да сваіх настаўнікаў, да сваіх малодшых сяброў, якім яшчэ трэба будзе спасцігаць навуку у сценах “alma mater”. А пасля пад гукі лірычнага вальса закружыліся ў танцы выпускнікі са сваімі маленькімі сябрамі, якія сёлета закончылі першы клас.
Адзінаццацікласнік Уладзіслаў Латышонак і першакласніца Аліна Ермашкевіч пераліўным апошнім званком абвясцілі аб заканчэнні чарговага навучальнага года, аб заканчэнні школы.
У добры і шчаслівы шлях, дарагія выпускнікі! Бывай, родная школа!
Сяргей РАЙЧОНАК.
