Тыдзень пачатковых класаў прайшоў у Войстамскай школе

З 18 па 22 лютага праходзіў Тыдзень пачатковых класаў. Праходзіў ён пад дэвізам “Маленькай Радзіме прысвячаецца…”  На працягу тыдня спаборнічалі дзве каманды: каманда Васіля і каманда Аленкі. Кожны ўдзельнік стараўся прынесці сваёй камандзе жэтон: атрымаць на мерапрыемстве, за добрыя паводзіны, іза акуратнае вядзенне сшыткаў ці дзённіка і г.д.

Кожны дзень быў насычаны цікавымі мерапрыемствамі, конкурсамі, алімпіядамі, выставамі і меў сваю назву: Дзень сяброўства, Дзень матэматыкі, Дзень экалогіі, Дзень роднай мовы і Дзень здароўя.

Самым цікавым і запамінальным для навучэнцаў стаў Дзень роднай мовы. У гэты дзень прайшоў конкурс чытальнікаў вершаў на беларускай мове, інтэрактыўная гульня “Знаўцы роднай мовы”, алімпіяда па беларускай мове, а самае цікавае, што дзеці самі спрабавалі стаць паэтамі.

Хутка праляцеў час, падведзены вынікі, узнагароды знайшлі сваіх герояў. Але самае галоўнае, што кожны з нас яго правёў з карысцю.

Ала РЫДЗЕЛЬ, настаўнік пачатковых класаў ДУА “Вучэбна-педагагічны комплекс Войстамскі яслі-сад-базавая школа”

Фота аўтара.