Украінцы дапамаглі знайсці мінчука, падазраванага ў вырабе дзіцячай парнаграфіі
Следчы камітэт
Украінцы дапамаглі знайсці мінчука, падазраванага ў вырабе дзіцячай парнаграфіі. 40-гадовы мужчына ў 2017 годзе ствараў сцэнары порнафільмаў, а двое ўкраінцаў выраблялі відэаролікі з удзелам малалетняга (у адным выпадку выкарысталі 5-гадовае дзіця), інфармуе прэс-служба Следчага камітэта Беларусі.
Інфармацыя ад украінскіх праваахоўнікаў прыйшла ў Мінск у верасні мінулага года. З яе вынікала, што ў Беларусі знаходзіцца карыстальнік інтэрнэту, які мае дачыненне да вырабу, рэкламавання і распаўсюду дзіцячай парнаграфіі (на спецыялізаваных сайтах размяшчаліся відэаматэрыялы з мэтай іх продажу). Ён канспіраваўся, выкарыстоўваў пры разліках крыптакашалёк.
Міліцыя праверыла аператыўныя матэрыялы і выйшла на згаданага мінчука, у яго кватэры прайшоў ператрус. Мужчына, кіраўнік аддзела адной з арганізацый, затрыманы. У яго дачыненні распачатая крымінальная справа, артыкул — выраб і распаўсюд парнаграфічных матэрыялаў, здзейснены арганізаванай групай. Мінчуку пагражае пазбаўленне волі на тэрмін ад 5 да 13 гадоў. Раней ён да крымінальнай адказнасці не прыцягваўся.