Асіповічы: коратка аб розным

У Татаркаўскім сельсавеце абследаваны ўсе 364 домаўладанні. На пачатку тыдня пры праведзеным сумесна з РАНС паўторным абследаванні жылля грамадзян, якія вядуць асацыяльны лад жыцця, састаўлены адміністрацыйны пратакол. У мэтах бяспекі праведзена работа па абмежаванні доступу да 7 безгаспадарных дамоў, размешчаных у населеных пунктах сельсавета.

Гран-пры III Міжнароднага фестывалю мастацтваў “#BYFEST” заваявала вучаніца дзіцячай школы мастацтваў № 2 8-гадовая Яніта Башко (кіраўнік Людміла Доўнар).

Iнспекцыя па справах непаўналетніх РАУС праводзіць індывідуальную прафілактычную работу з 55 падлеткамі-правапарушальнікамі, сярод якіх 18 дзяўчын, 23 — навучэнцы ПТВ і каледжаў, 3 раней судзімыя. Самыя малодшыя падапечныя, з якімі інспектары гутараць аб небяспецы супрацьпраўных паводзін, — два 11-гадовыя хлопчыкі, якія ў мінулым годзе ўчынілі падпал нежылога дома.

АЗВЭС працягвае рэканструкцыю тэлефоннай сеткі: у бягучым годзе на GPON пераключана больш за 1500 абанентаў. Iнтэнсіўна праводзіцца перавод на сеткі “Белтэлекам” абанентаў, якія раней карысталіся чыгуначнай тэлефоннай сувяззю: новыя нумары атрымалі ўжо 320.

На традыцыйную сустрэчу кіраўніцтва РУП “Магілёўскае аддзяленне Беларускай чыгункі” з маладымі спецыялістамі, якая нядаўна прайшла ў абласным культурна-спартыўным цэнтры, прадпрыемствы Асіповіцкага чыгуначнага вузла дэлегавалі 15 сваіх “навабранцаў”. Рабяты не толькі многае даведаліся аб арганізацыі працы аддзялення, але і наведалі з экскурсіяй санаторый “Дубравенка” і сталі гледачамі фіналу конкурсу “Клуба вясёлых чыгуначнікаў”.