У гэтым годзе ААТ “Кароцічы” ў ліку лідараў па нарыхтоўцы кармоў. Тут назапасілі 6038 тон, што амаль на 500 тон больш да ўзроўню мінулага года. Запоўнены не толькі старыя сянажныя траншэі, але і дзве новыя, якія пабудавалі сёлета. Адну рабілі сваімі сіламі, а другую – Столінская ПМК-24.
Як расказаў дырэктар гаспадаркі Васіль Пятровіч Кудласевіч, у гэтым годзе амаль увесь скошаны зялёны корм трамбавалі ў траншэі, а кармілі кароў мінулагоднімі запасамі, якія дзякуючы захаванню ўсіх тэхналогій мелі высокую якасць. Таму ў гэтым годзе нарыхтавалі наперад.
На гэта ёсць некалькі падстаў. Самая галоўная – гэта зладжаны калектыў, які імкнуўся рабіць усё хутка і дакладна. Касілі палеткі Аляксей Аляксеевіч Талмачэвец і Васіль Фёдаравіч Серадзін. На прэсах рабілі вопытныя Уладзімір Дзям’янавіч Шчучка і Іван Іванавіч Кудласевіч. На адвозцы былі задзейнічаны механізатары Аляксей Фёдаравіч Комар, Рыгор Рыгоравіч Сямейка і Аляксандр Аляксеевіч Кудласевіч.
Як жартуюць мужчыны, трэба было дзерці лыка, пакуль дзярэцца. Спрыяла надвор’е, што таксама іграла вялікую ролю. У нарыхтоўцы высакаякасных кармоў важна своечасова скошваць травы, якія найбольш багатыя пажыўнымі рэчывамі і вітамінамі ў раннія фазы развіцця: бабовыя – у фазу бутанізацыі, злакавыя – у перыяд каласавання і пачатку цвіцення. Акрамя таго, ранняя ўборка траў спрыяе добраму адрастанню травастою і атрыманню другога ўкосу. Галоўная ўмова нарыхтоўкі высакаякаснага сена – гэта працэс сушкі ў кароткія тэрміны. Даводзілася і лавіць сонечныя дні, паколькі ў дрэннае надвор’е скошанную масу прасаваць нельга, бо пажыўныя рэчывы вымываюцца вадой.
– Нашы хлопцы вопытныя, таму работнікі на “пяць”, – дзеліцца Васіль Пятровіч. – Самі ведаюць, што да чаго, і працуюць як адзіны механізм. Іншых у нас не бывае. Таму хачу ім падзяваць. Усё ж няма нічога важней, як адказны і сумленны калектыў. Бо як працуеш – так і маеш.
Спадзяюся, што ў наступным годзе мы не страцім свае пазіцыі.
Ганна МЕЛЬНІК
Фота
Вольгі КОВАЛЬ