Пациентов Осиповичского района примут молодые специалисты

Маладых спецыялістаў у гэтай установе чакаюць як нідзе. І не толькі калектыў ЦРБ заклапочаны тым, каб укамплектаваць штат, але і пацыенты хочуць убачыць у медыцынскіх кабінетах бальніц, паліклінік, амбулаторый і ФАПаў новых дактароў і медсясцёр, якія многім дапамогуць зняць боль, вернуць упэўненасць у будучыні і, можа, выратуюць чыёсьці жыццё.

Днямі ў раённай паліклініцы віталі выпускнікоў вышэйшых і сярэдніх спецыяльных медыцынскіх навучальных устаноў, якія пачалі свой прафесійны шлях на Асіповіччыне. Першае працоўнае месца ў раёне набылі 7 дактароў і 13 спецыялістаў сярэдняга звяна. Прыбылі на работу ўрач лабараторнай дыягностыкі, неўролаг, псіхіятр-нарколаг, анколаг, акушэр-гінеколаг, урачы агульнай практыкі, папоўнілася маладымі спецыялістамі аддзяленне хуткай дапамогі і іншыя структурныя падраздзяленні ЦРБ.

Галоўны ўрач Павел Шаціла адзначыў, што маладыя людзі выбралі няпростую, але цікавую і патрэбную прафесію, самую гуманную ў свеце. І пажадаў не спыняцца на дасягнутым, займацца самаразвіццём, выразіў спадзяванне, што хлопцы і дзяўчаты застануцца ў абранай прафесіі і прысвецяць ёй многія гады.

Кожны малады спецыяліст атрымаў настаўніка, які дапаможа хутчэй адаптавацца ва ўстанове і заўсёды дасць слушную параду.

Галоўны спецыяліст аддзела ідэалагічнай работы, культуры і па справах моладзі райвыканкама Ларыса Волкава пажадала ўсім поспехаў у працы і прапанавала звяртацца з пытаннямі, якія хвалююць, з новымі ідэямі і прапановамі па арганізацыі жыцця моладзі, пазнаёміла з правамі маладых спецыялістаў, у прыватнасці на льготнае крэдытаванне.

Старшыня ветэранскай “пярвічкі” ЦРБ Зінаіда Пацкевіч дала наказ маладым быць адданым прафесіі, а потым правяла экскурсію ў пакой гісторыі ўстановы.

Адметна, што большасць медыкаў, якія сёлета прыбылі да нас на работу, вырасла на Асіповіччыне. Спадзяёмся, што раён зможа ганарыцца сваімі гадаванцамі.

Фота Настассі МАЦЮШЭНКА.