Рабочы ў Баранавічах страціў прытомнасць і зваліўся пад газавую гарэлку

Следчы камітэт высвятляе акалічнасці здарэння ў Баранавічах, дзе ў мужчыны абгарэлі ногі падчас працы. 

Здарэнне адбылося 20 жніўня прыкладна ў 14.30. 50-гадовы жыхар Баранавічаў працаваў у індывідуальнага прадпрымальніка па працоўнай дамове. Мужчына чысціў металічную агароджу ад фарбы з дапамогай газавай гарэлкі. Аднак падчас працы ён страціў прытомнасць і паваліўся. Пры гэтым ён выпусціў шланг газавай гарэлкі. Пакуль мужчына быў без прытомнасці, яго ногі абгарэлі ад агню ўключанай гарэлкі.

Пацярпелага знайшлі мінакі, якія выключылі гарэлку і выклікалі лекараў. Траўмаваны рабочы цяпер знаходзіцца ў рэанімацыі.