Вікторыя над “Вікторыяй”
20.08.2018
—
Разное
У мінулую суботу, 18 жніўня, ФК “Івацэвічы” на дамашняй арэне ў рамках 18-га тура першынства Беларусі па футболе сустракаўся з ФК “Вікторыя” з Мар’інай Горкі – з моцным серадняком, які ў першым крузе на дамашняй арэне перамог нашых рабят з лікам 1:0.
І ў гэтай гульні гасцявая каманда дзейнічала ўпэўнена, часта атакавала, але ў іх складзе не аказалася такога галеадора, як наш нападаючы Ілья Федарэнка, які двойчы ў першым тайме і адзін раз пад заканчэнне гульні паразіў вароты “Вікторыі”. Сапраўды бенефіс Ільі – гэтыя тры галы ён забіваў і дзякуючы індывідуальным дзеянням, і агульнакамандным. Яшчэ адзін гол “з раздзявалкі” на старце другога тайма забіў Дзмітрый Пятроўскі. Гасцявая каманда хаця і многа атакавала (асабліва ў другім тайме), але нават гол прэстыжу забіць не здолела.
Упэўненая перамога з лікам 4:0.
Гэта сёмая перамога нашых рабят у бягучым першынстве. У бліжэйшыя выхадныя ім прадстаіць далёкі ваяж у Магілёўскую вобласць – у Горкі. Тут яны згуляюць з мясцовай камандай, якую ў першым крузе, у маі, перамагла ФК “Івацэвічы” на дамашняй арэне з лікам 2:0.
Аляксандр ГОРБАЧ.