Падчас летніх канікул у Германавіцкай школе працаваў грамадзянска-патрыятычны лагер “Нашчадкі”
Што такое канікулы? Гэта вялікая весялосць і свята для кожнага школьніка. А што такое лета? Гэта тры месяцы непаўторных пачуццяў, вясёлых усмешак, гульняў, адпачынку і мора рознакаляровых фарбаў у жыцці кожнага. А што будзе, калі скласці іх разам? Атрымаюцца летнія канікулы!
Канікулы, лета — цудоўная пара! Можна добра адпачыць, пагуляць, аздаравіцца. І лепш за ўсё гэта зрабіць у лагеры. У Германавіцкай школе працаваў грамадзянска-патрыятычны лагер “Нашчадкі”, у склад якога ўвайшлі тры атрады: малодшы — “Рамонкі”, сярэдні — “Валошкі”, старэйшы — “Тутэйшыя”.
Час, праведзены ў лагеры, запомніцца нам надоўга. З першых яго хвілін мы зразумелі, што нам будзе тут цікава, весела і ўтульна. З добрым настроем і прыемнымі ўсмешкамі сустрэлі нас выхавацелі. Лагер пачаў сваю работу з урачыстай лінейкі. Начальнік лагера Іна Сямёнаўна Пучынская павіншавала з адкрыццём лагера і пажадала кожнаму з нас назапасіць добрых эмоцый, набрацца сіл, паказаць свае здольнасці.
Ужо ў першы дзень мы разам з выхавацелямі спланавалі работу ў атрадах, размеркавалі абавязкі, выбралі камандзіраў, аформілі атрадныя куткі.
Кожны дзень пачынаўся і заканчваўся лінейкай. Права ўзняць і апусціць сцяг мелі тыя з нас, хто выдатна праяўляў сябе ў розных акцыях і справах. Кожную раніцу праводзілася зарадка. Пасля яе з добрым настроем мы ішлі ў сталовую на сняданак.
Сняданкі і абеды былі заўсёды вельмі смачнымі і карыснымі, за што мы гаворым вялікі дзякуй нашым паварам Валянціне Валянцінаўне Хахолка і Але Мечыславаўне Кавалёнак. А яшчэ на поўднік былі розныя прысмакі.
Кожны дзень быў вельмі насычаным на разнастайныя справы і мерапрыемствы. У Год малой радзімы мы стараліся як мага больш зрабіць, каб наш аграгарадок быў прыгажэйшым і ўтульным. Таму ў нашым лагеры праводзілася шэраг працоўных і патрыятычных акцый. Мы добраўпарадкавалі тэрыторыю каля школы, праводзіді экалагічныя акцыі на вуліцах аграгарадка і ў старадаўнім парку. Атрад “Рамонкі” разам з выхавацелем Лідзіяй Генадзьеўнай Мядзелец наведалі ў вёсцы Жукі Ложныя брацкую магілу воінаў 166-й стралковай дывізіі, навялі там парадак і ўсклалі кветкі. Атрад “Тутэйшыя” разам з выхавацелем Жаннай Лявонцьеўнай Бурэнь і Інай Сямёнаўнай Пучынскай на вясковых могілках у вёсцы Цярэшкі прыбралі пахаванні польскіх салдат. Па добраўпарадкаванні тэрыторыі каля касцёла Перамянення Пана, стараверскай Свята-Успенскай царквы і праваслаўнай царквы працаваў атрад “Валошкі” разам з выхавацелямі Верай Генадзьеўнай Мядзелец і Віктарам Станіслававічам Лагуном.
У лагеры мы не толькі працавалі, але і вельмі цікава адпачывалі. Асабліва спадабаліся нам квэст-гульні, спартландыі, экскурсіі, хвіліны славы, музейныя гадзіны. Вялікі дзякуй супрацоўніку Германавіцкага музея мастацтва і этнаграфіі імя Язэпа Драздовіча Таццяне Антонаўне Катовіч, дырэктару Германавіцкага ЦК і НТ Вользе Іванаўне Сташкевіч, якія рыхтавалі захапляльныя мерапрыемствы і дапамагалі зрабіць наш адпачынак больш разнастайным.
У апошні дзень лагера праводзіўся конкурс “Міс і Містэр Лета- 2018” .
У намінацыі “Міс і Містэр Ідэальнасць” атрымалі перамогу Анастасія Пажарская і Яўген Пушкель, у намінацыі “Міс і Містэр Арыгінальнасць” — Аляксандра Пяцько і Дзмітрый Красоўскі, у намінацыі “Міс і Містэр Сяброўства” — Паліна Цярэшка і Віталь Шабан, а “Міс і Містэрам Лета-2018” сталі Ульяна Сташкевіч і Кірыл Абрамчык.
На заключнай лінейцы падвялі вынікі і ўручылі дыпломы самым актыўным, працавітым і спартыўным.
Вось чым запомніўся нам грамадзянска-патрыятычны лагер “Нашчадкі”. Змястоўным і насычаным атрымаўся адпачынак, дзякуючы выхавацелям Л. М. Рымчонак, В. Г. Мядзелец, Г. І. Мядзельцу, Л. Г. Мядзелец, П. П. Рубніковічу, Ж. Л. Бурэнь, В. С. Лагуну, А. І. Лагун і асабліва начальніку лагера І. С. Пучынскай.
Ганна ВЫСОЦКАЯ,
Ульяна СТАШКЕВІЧ,
вучаніцы Германавіцкай сярэдняй школы.
