Этнаграфічныя пляцоўкі з’явіліся ў аграгарадках Воранаўшчыны

Пад адкрытым небам іх аформілі работнікі клубных устаноў раёна. Цярпліва і ашчада яны гадамі збіралі экспанты ў навакольных вёсках, а напярэдадні галоўнага свята краіны далі магчымасць сваім землякам дакрануцца да спадчыны малой радзімы.

Ёсць што паказаць у Жырмунах. У мінулым годзе ў будынку мясцовага цэнтра культуры і дасуга адкрылася этнаграфічная экспазіцыя “Сцежкамі продкаў”, стылізаваная пад сялянскую хату. Больш за дзвесце экспанатаў, сабраных школьнікамі і работнікамі ўстановы на жырмунскай зямлі, дапамаглі стварыць каларыт беларускай вёскі. Прылады працы, мэбля, посуд,адзенне выдатна захаваліся, у чым можна было ўпэніцца ўвачавідкі.  Частка рэчаў пакінула сцены пакоя, “перасяліліся” на пляўцоўку ў цэнтры аграгарадка.

У Жырмунах існуе аматарскае аб’яднанне “Уют” для жанчын сталага ўзросту. У яго ўваходзяць трынаццаць мясцовых рукадзельніц, якія займаюцца вышыўкай, вязаннем, выцінанкай, вырабам сувеніраў з прыроднага матэрыялу. Майстрыцы з’яўляюцца носьбітамі народных мастацтваў, якія са старажытных часоў былі жыццёва неабходнымі рамёствамі сялянскага быту. Іх работы таксама былі прадстаўлены на пляцоўцы.

Жыхары аграгарадка, нягледзячы на ветранае надвор’е, не праходзілі міма. Спыняліся, разглядвалі рэчы. Моладзь цікавіліся не толькі іх назвамі, але і тым, для чаго яны выкарыстоўваліся ў свой час.Тлумачыла і расказвала аб усім загадчыца цэнтра Святлана Вараноўская.

Вольга ВАРАБ’ЁВА.