У пачатку чэрвеня на Карэліччыне стартавала культурна-асветніцкая акцыя з сімвалічнай назвай “Яшчэ жыве бацькоўскі зруб”, прысвечаная Году малой радзімы і накіраваная на актывізацыю культурнага адпачынку людзей пажылога ўзросту.
У тым, што летам у вёсцы працы больш чым дастаткова, сумнявацца не прыходзіцца. Але адарвацца ад паўсядзённых клопатаў і атрымаць асалоду ад беларускіх народных песень будзе карысна і мясцовым жыхарам пажылога ўзросту, і іх унукам, якія прыехалі ў вёску на летнія канікулы.
Менавіта такі культурны адпачынак прапаноўваюць супрацоўнікі раённага Цэнтра культуры і народнай творчасці, якія разам з бібліятэкарамі Карэліцкай раённай бібліятэкі накіроўваюцца ў маланаселеныя пункты Карэліччыны і дзеляцца сваёй творчасцю з мясцовымі жыхарамі. Актыўны ўдзел у акцыі «Яшчэ жыве бацькоўскі кут» прымаюць і супрацоўнікі сельскіх клубных устаноў культуры.
На мінулым тыдні вёска Тупалы першай сустракала народны ансамбль народнай песні “Забава”, у выкананні якога прагучалі вядомыя і любімыя беларускія песні “Цячэ вада ў ярок”, “Звіняць звоншчыкі”, “Ехаў Ясь на кані”і іншыя. Жыхары вёскі не толькі цёпла віталі артыстаў, але і падпявалі песні сваёй маладосці.
Дадому мясцовыя жыхары разыходзіліся ў добрым настроі і з любімымі кнігамі і часопісамі ў руках, вольны час з якімі будзе цікавы і карысны.
Культурна-асветніцкая акцыя “Яшчэ жыве бацькоўскі зруб” абяцае стаць штотыднёвай. Таму кожную сераду жыхары адной з вёсак Карэліччыны будуць далучацца да кніжных скарбаў і мастацкай дзейнасці аднаго з лепшых творчых калектываў раёна.
Аксана ЯНУШ.
Фота Ганны НОВІК.