Когда растут возле могил деревья. Читатель поднимает проблему
“На могілках у Кублічах пахаваны ўсе нашы родныя. Побач з магіламі растуць тры бярозы, адна з іх вельмі вялікая, і калі заваліцца, то пашкодзіць помнікі і агароджу. Неаднойчы звярталіся ў мясцовы сельсавет з просьбай выдаліць іх, нам адказвалі, што патрэбны кран з пад’ёмнікам і гэта дорага. Самім не справіцца, ужо па 70 год, ды і могілкі – месца грамадскае. Спадзяёмся на дапамогу рэдакцыі, паколькі не ведаем, што будзем рабіць, калі бяроза паб’е абеліскі. Мяркуем, што праблему можна вырашыць на мясцовым узроўні.”
Гэты ліст у рэдакцыю даслалі нашы чытачы І.Жаваранак, Л.Ушкурава, В.Быкава і К.Кандрацкая. Можна адзначыць, што гэта адно з самых распаўсюджаных пытанняў, з якім звяртаюцца жыхары многіх населеных пунктаў. Практычна ўсе могілкі раёна старажытныя, пахаванні, як правіла, рабіліся ў сасонніках ці ўзлесках, ды і самі людзі садзілі ля магіл дрэвы, якія з часам сталі пагрозай для помнікаў і агароджаў.
Зразумела, ліст мы пераадрасавалі старшыні Кубліцкага сельвыканкама М.В.Ярмош, у чыёй кампетэнцыі і знаходзіцца пытанне.
Марыя Васільеўна хоць зусім нядаўна і абследавала літаральна ўсе могілкі, што знаходзяцца на тэрыторыі сельсавета і вызначала першачарговыя па навядзенні парадку і выдаленні аварыйных дрэў, аднак наведала кубліцкія ў чарговы раз і дала нам наступны адказ.
“Бярозы, пра якія ідзе гаворка ў лісце, не з’яўляюцца аварыйнымі, аб чым спецыялістам па ахове лесу Ушацкага лясгаса І.Шугалеем складзены адпаведны акт. Таму і выдаляцца пакуль не будуць. Больш таго, рабіць гэтага нельга і самім грамадзянам, калі б яны знайшлі сродкі і арганізацыю, якая б пагадзілася выканаць гэтыя спецыялізаваныя і вельмі дарагія работы. Сельвыканкам выдаляе аварыйныя дрэвы, нядаўна гэта зроблена на месцы пахавання продкаў у Мажуйках, будзем працягваць і далей, у тым ліку і за сродкі самаабкладання, як у прыведзеным вышэй выпадку. Аднак паўтару, што спілоўваюцца сухія дрэвы, што афіцыйна прызнаны аварыйнымі. Жанчынам жа, што пісалі ліст, каб не хвалявацца наконт помнікаў, можна параіць застрахаваць іх. Тады ў выпадку буры ці іншых наступстваў, калі на агароджу ці абеліск паваліцца дрэва, яны атрымаюць кампенсацыю. Таксама хачу нагадаць, што зараз наогул забаронена пасадка дрэў ля магіл”.
Падрыхтавала Вольга КАРАЛЕНКА.