Пад Ляхавічамі падлеткі скакалі на дарогу перад машынамі, адзін загінуў
![Пад Ляхавічамі падлеткі скакалі на дарогу перад машынамі, адзін загінуў](http://www.21.by/pub/news/2018/05/1527530676925252.jpg)
Фота: gaibrest.by
Трагічнае ДТЗ адбылося ўначы 27 траўня ў Ляхавіцкім раёне. У выніку аўтааварыі загінуў падлетак, перадае прэс-служба брэсцкай ДАІ.
Паводле папярэдняй версіі, інцыдэнт здарўся каля 2-й гадзіны ночы. 27-гадовы жыхар Бабруйска на аўтамабілі "Даф" з прычэпам "PANOV" ехаў па аўтадарозе Р-43 "Крычаў-Слуцк-Івацэвічы". Каля вёскі Тальмінавічы ён збіў непаўналетняга пешахода, які стаяў пасярэдзіне правай паласы праезнай часткі. 17-гадовы хлопец, на якім не было флікераў, памёр на месцы ДТЗ.
Праверка выявмла. што кампанія з трох хлопцаў (двум па 17 гадоў, аднаму — 18) была на дыскатэцы ў вёсцы Сіняўка Клецкага раёна. Там хлопцы выпівалі, пасля чаго пешшу пайшла дадому. Яны рухаліся па ўзбочыне дарогі і дурэлі.
Кіроўца кажа, што ў нейкі момант пабачыў у цемры цені двух хлопцаў, якія па чарзе выскоквалі з левай узбочыны на праезную частку, а потым вярталіся на ўзбочыну. Кіроўца крыху знізіў хуткасць. А потым проста перад сабой пабачыў, як з праезнай часткі падымаецца трэці хлопец. Кіроўца націснуў на тормаз, але спыніць аўтамабіль ужо не змог.
Дарэчы, сябры загінулага падлетка адразу ж уцяклі з месца ДТЗ. Міліцыянты знайшлі іх толькі зранку.
Выявілася, што загінулы 17-гадовы хлопец — жыхар вёскі Гайнінец Ляхавіцкага раёна, ён навучаецца ў ПТВ ў Баранавічах. На выходныя падлетак прыехаў да бацькоў.
У кіроўцы ўзялі кроў на аналіз. Утрыманне алкаголю ў выдыханым паветры, як выявілі медыкі, склала 0,0% праміле.