Слаўся, зямлі нашай светлае імя! Дзень Дзяржаўнага герба і Дзяржаўнага флага Рэспублікі Беларусь сёння адзначылі ў Воранаве.
Сярод удзельнікаў урачыстага мітынгу ветэраны вайны і працы, члены райвыканкама, дэпутаты райсавета, прадстаўнікі працоўных калектываў і грамадскіх арганізацый, моладзь, школьнікі.
Пад велічныя гукі Дзяржаўнага гімна Рэспублікі Беларусь актывіст раённай ветэранскай арганізацыі Казімір Чарнэль і вучаніца 11-га класа Воранаўскай сярэдняй школы, пераможца обласнога этапа рэспубліканскай алімпіяды па грамадазнаўству Соф’я Трэкала, уздымаюць Дзяржаўны флаг Рэспублікі Беларусь.
— Наш народ стагоддзямі ішоў да незалежнасці, абараняў сябе і родную зямлю ад фізічнага і духоўнага прыгнёту, — зазначыў намеснік старшыні раённага выканаўчага камітэта Андрэй Карповіч. — І гэты шлях адлюстраваны ў галоўных сімвалах Рэспублікі Беларусь, якія ўвасобілі ў сабе найважнейшыя каштоўнасці і ідэалы беларусаў — любоў да Айчыны, імкненне да свабоды і справядлівасці, да стваральнай працы на сваёй зямлі, жаданне жыць у міры і згодзе ў нашым агульным беларускім доме.
З павагі да афіцыйных сімвалаў пачынаецца любоў да сваёй малой радзімы, прыналежнасць да яе лёсу. Без ведаў гісторыі, пераемнасці гістарычных і культурных традыцый нельга будаваць планы на будучыню. Няхай гэтае свята яшчэ больш аб’яднае нас, умацуе высокае пачуццё асабістай адказнасці кожнага грамадзяніна за краіну і гатоўнасці самааддана працаваць дзеля працвітання Радзімы.
Аб вялікім і пачэсным абавязку моладзі паважаць дзяржаўныя сімвалы і быць патрыётамі роднай краіны мовіла першы сакратар РК ГА “БРСМ” Наталля Мяцеліца, пранікнёна спяваў дзесяцікласнік Воранаўскай СШ Дзмітрый Камінскі.
А запушчаныя ў неба чырвоныя, зялёныя і белыя паветраныя шары сталі яркім сімвалам росквіту і заможнасці нашага роднага краю.
Вікенцій ЯКОВІЧ.
Фота Алега БЕЛЬСКАГА.
