Урачыстаcць Божай Міласэрнасці святкавалі ў воранаўскім санктуарыі

У другую Велікодную нядзелю каталіцкі Касцёл адзначае свята Божай Міласэрнасці, якое ў 2000 годзе ўстанавіў св. Папа Ян Павел II. Аднаму з касцёлаў у нашым раёне, а менавіта Святых апосталаў Сімяона і Юды Фадзея ў Воранаве ўжо два гады дадзены тытул Санктуарыя Божай Міласэрнасці.

Сёння тут упершыню адбыўся фэст. На сумесную малітву сабраліся не толькі вернікі з Воранаўшчыны, але і госці з іншых дэканатаў дыяцэзіі і нават з суседняй Літвы, а таксама мясцовыя ўлады, прыехалі святары з ордэна Палатынаў, якія тут нарадзіліся. Урачыстую святую імшу ўзначаліў біскуп Гродзенскай дыяцэзіі Аляксандр Кашкевіч. Пасля набажэнства святары і вернікі прайшлі ва ўрачыстай працэсіі. Пасля адбылося адмысловае набажэнства  — Акт адданя Божай Міласэрнасці. На завяршэнне свята біскуп Аляксандр Кашкевіч пажадаў парафіянам і святарам, каб сённяшні фэст з кожным годам набіраў усё большую моц і ў Воранава з’язджаліся і зыходзіліся шматлікія пілігрымы, якія будуць славіць Божую Міласэрнасць. Таксама павіншаваў праваслаўных веруючых са Светлай Пасхай.

Сапраўдную асалоду ад музыкі і спеваў у гонар Бога атрымалі тыя, хто застаўся на канцэрт моладзевага хрысціянскага гурту “Рыбы”.

Падрабязней чытайце ў наступным нумары раёнкі.

Наталля Івуць.

Фота аўтара.