На канікулах не сумуем!
У вучняў пачаліся вясеннія канікулы, але дзверы школ для іх застаюцца адкрытымі. У кожнай установы адукацыі раёна ёсць праграма арганізацыі адпачынку дзяцей. Вялікая ўвага надаецца здароваму ладу жыцця, таму школы імкнуцца максімальна задзейнічаць спартыўныя залы. Падчас канікул адбудуцца раённыя спаборніцтвы па гандболе. Многія мерапрыемствы пройдуць пад знакам Года малой радзімы, якім абвешчаны 2018-ы. У сувязі з гэтым актыўна будзе выкарыстана сацыякультурная прастора рэгіёна. Так, будуць арганізаваны паходы ў музей. Раённы Цэнтр турызму, краязнаўства і экскурсій прапаноўвае паездкі ў розныя гарады, экскурсіі па гістарычных мясцінах Крычаўшчыны. Установы дадатковай адукацыі арганізуюць для дзецей ігравыя праграмы, турніры эрудытаў… На базе СШ № 8 адбудзецца раённая алімпіяда па вучэбных прадметах сярод вучняў малодшых класаў. Таксама падчас вясенніх канікул 7 навучэнцаў раёна прымуць удзел у заключным этапе рэспубліканскай алімпіяды па вучэбных прадметах. Дарэчы, летась такіх было толькі 2 чалавекі.
Сёлета споўнілася 75 гадоў з дня хатынскай трагедыі. З гэтай нагоды пройдзе раённы этап конкурсу “Дарогамі памяці”. Школьнікі збяруць інфармацыю пра спаленыя населеныя пункты, сустрэнуцца са сведкамі вайны і іх сем’ямі… Працаваць у музеях і архівах вучні будуць і ў рамках акцыі “Мы гэтай памяці верныя”, грамадзянска-патрыятычнага праекта “Збяры Беларусь у сваім сэрцы”. Падчас канікулаў у школах арганізаваны лагеры. Да Міжнароднага дня тэатра тут пакажуць розныя фільмы. Асаблівая ўвага надаецца арганізацыі вольнага часу дзяцей, якія знаходзяцца ў сацыяльна небяспечным становішчы. Іх вучаць здароваму ладу жыцця, законапаслухмяным паводзінам. Словам, на канікулах вучні не сумуюць. Кожны школьнік можа знайсці занятак па душы – спартыўны, культурны, адукацыйны, забаўляльны…
Анжэліка Саўчанка.