На розных полюсах

Паўнавартасная лінейка гатоўнасці трактароў у эксперыментальнай базе “Натальеўск” з цяжкасцю ўмясцілася ў кадр

У мінулы чацвер на Чэрвеньшчыне завяршыўся асноўны этап дзяржаўнага тэхнічнага агляду трактароў і прычэпаў, якія належаць гаспадаркам раёна.
У гэты дзень разам з начальнікам раённай інспекцыі Дзяржтэхнагляду Мікалаем Капальнюком мы выправіліся ў адкрытае акцыянернае таварыства “Лядзенскі” і дзяржаўнае прадпрыемства “Ганута-Агра”. Як патлумачыў Мікалай Капальнюк, гэтыя гаспадаркі, як найбольш праблемныя, адмыслова былі пастаўлены ў графік тэхагляду апошнімі, каб даць ім больш часу на падрыхтоўку.

Начальнік раённай інспекцыі Дзяржтэхнагляду Мікалай Капальнюк праводзіць тэхагляд трактара, які замацаваны за натальеўскім механізатарам Мікалаем Смусянком

Наведванне ААТ “Лядзенскі” пакінула сумныя ўражанні. Тут аказаліся фактычна негатовымі да тэхагляду.

– Кіраўнікі ўсіх сельгаспрадпрыемстваў пад роспіс атрымалі апавяшчэнні, у якіх падрабязна распісаны ўсе патрабаванні да агляду тэхнікі, аднак у “Лядзенскім” своечасова не паклапаціліся пра элементарныя рэчы, – пракаментаваў сітуацыю Мікалай Капальнюк. – Ужо адно тое, што гаспадарка не прадаставіла дакумент аб аплаце дзяржпошліны, не дазваляе мне праводзіць тэхагляд. Акрамя таго, няма акта тэхагляду, у які павінна быць унесена ўся тэхніка, што знаходзіцца на балансе, і які павінен быць прадастаўлены не пазней, чым за дзесяць дзён да правядзення тэхагляду. Няма і спісу механізатараў за подпісам супрацоўніка ДАІ з адзнакамі аб тым, што яны не пазбаўлены правоў на кіраванне. А нешматлікія трактары, якія выстаўлены на лінейку гатоўнасці, нават па знешняму выгляду не адпавядаюць патрабаванням, што прад’яўляюцца пры тэхаглядзе: асобныя элементы канструкцый пакрытыя застарэлай іржаўчынай, шыны на колах некаторых трактароў маюць недапушчальную ступень зносу…

Такім чынам, тэхагляд у ААТ “Лядзенскі” ў прызначаны графікам дзень не адбыўся. А вось у суседняй гаспадарцы, дзяржаўным прадпрыемстве “Ганута-Агра”, мы ўбачылі зусім іншы малюнак. Нягледзячы на тое, што яго эканамічны стан супастаўны з ААТ “Лядзенскі”, тут знайшлі фінансавыя магчымасці, каб прадставіць на тэхагляд сто працэнтаў трактароў. Больш паловы іх з першага разу атрымалі допуск на ўдзел у дарожным руху. Галоўнае ж, што было відавочным, гэта жывая зацікаўленасць і заклапочанасць кожнага механізатара, выконваючага абавязкі загадчыка майстэрняў Пятра Бурага, а таксама новага дырэктара гаспадаркі Сяргея Пінчука.

На фотаздымках унізе: “лінейка гатоўнасці” па-лядзенску: непафарбаваны, са слядамі карозіі і адсутнасцю дзвюх гаек, дыск кола трактара; іржавая і скрыўленая прыступка ў кабіну трактара.

Падводзячы вынікі асноўнага этапу тэхагляду ў сельгаспрадпрыемствах, Мікалай Капальнюк адзначыў высокі ўзровень падрыхтоўкі да яго ў эксперыментальнай базе “Натальеўск”, ААТ “Раванічы” і СВФ “Аграбуд” ААТ “Мінскжалезабетон”. У гэтых гаспадарках на паўторную праверку пакінуты лічаныя адзінкі тэхнікі. А ў цэлым па раёну з першага разу прайшлі тэхагляд амаль 70 працэнтаў трактароў.

Ігар АДАМОВІЧ. Фота аўтара