Друкаванае слова застаецца актуальным

Сучасная інфармацыйная прастора здзіўляе сваёй разнастайнасцю і шматграннасцю. Тым не менш, карыстаючыся новымі тэхналогіямі, моладзь з цікавасцю гартае і свежы нумар раёнкі.

Вось і старшы следчы раённага аддзела Следчага камітэта Віктар Жукоўскі лічыць, што «Браслаўская звязда» застаецца карыснай і неабходнай крыніцай інфармацыі, якая расказвае пра раённыя падзеі.

— Добра памятаю з дзяцінства, — кажа Віктар, — як мае бацькі пасля работы заўсёды чыталі газету і абмяркоўвалі навіны. У школьныя гады сам звяртаўся да выдання, калі рыхтаваўся да палітінфармацыйных гадзін. Некаторыя выразкі з газеты ўклейваў у сшытак.

Падчас вучобы ў акадэміі, адзначае В. Жукоўскі, з задавальненнем праглядаў сайт «Браслаўскай звязды». Гэта дазваляла падтрымліваць сувязь з радзімай, даведвацца пра цікавыя падзеі, што адбываліся на Браслаўшчыне.

— Ужо паўтара года, як працую ў Следчым камітэце, і раёнка стала абавязковай газетай. З прафесійным інтарэсам чытаю артыкулы сваіх калег і супрацоўнікаў іншых праваахоўных службаў. Звяртаю ўвагу на матэрыялы пра маладых спецыялістаў, якія працуюць на карысць нашага раёна. Часам здзіўляюся, колькі таленавітых і цікавых людзей жыве на Браслаўшчыне. Ахоплівае радасць, калі на старонках газеты расказваецца пра добраўпарадкаванне, новыя аб’екты, што з’яўляюцца ў горадзе.

Абавязкова праглядаю анонсы мерапрыемстваў, віншаванні, не абыходжу ўвагай і рэкламу. Мне падабаецца разнастайнасць тэматыкі матэрыялаў і поглядаў журналістаў раёнкі.

Напрыканцы сустрэчы Віктар Жукоўскі пажадаў калектыву рэдакцыі знаходзіць разнастайныя злабадзённыя тэмы, каб газета далей заставалася цікавай і шматпланавай.

■ Алена ПЯТУШКА.

Фота аўтара.