У Мінску дзяўчына адбілася бутэлькай ад гвалтаўніка
Фота: ria.ru
У Мінску дзяўчына адбілася бутэлькай ад гвалтаўніка. Здарэнне адбылося ў мікрараёне Масюкоўшчына. Дзяўчына ішла ад прыпынку грамадскага транспарту да свайго дома і на кепска асветленым участку дарогі на яе ззаду напаў невядомы мужчына. Ён паваліў яе на зямлю і спрабаваў згвалціць. Аднак дзяўчына аказала актыўнае супраціўленне, ўдарыла зламысніка бутэлькай, якая ляжала на зямлі. Пасля гэтага мужчына схапіў сумку пацярпелай і ўцёк.
Як інфармуе афіцыйная прадстаўніца Фрунзенскага РУУС Мінска Наталля Аскірка, дзяўчына патэлефанавала ў міліцыю і распавяла пра здарэнне. Прыкметы зламысніка атрымалі ўсе міліцэйскія нарады, і неўзабаве яго знайшлі. Начальнік аддзела крымінальнага вышуку Фрунзенскага РУУС Аляксей Машкін, едучы на аўтамабілі па вуліцы Прытыцкага, заўважыў падазронага мужчыну, які відавочна спяшаўся, ішоў у куртцы, якая была апранута навыварат. Ён быў затрыманы.
Высветлілася, што затрыманаму 34 гады, ён нідзе не працуе. Праваахоўнікі даведаліся, што мужчына мае дачыненне да кватэрнага крадзяжу, здзейсненага ў тым жа раёне. У яго адносінах распачалі крымінальную справу па некалькіх артыкулах.