У Брэсце знайшлі гаспадыню сабакі, які ўкусіў хлопчыка на прыпынку
Фота: pixabay.com
Брэсцкія міліцыянты знашлі гаспадыню сабакі, які ўкусіў школьніка на прыпынку грамадскага транспарту. Пра падрабязнасці агенцтву БЕЛТА распавёў афіцыйны прадстаўнік УУС аблвыканкама Сяргей Дучэнка.
Здарэнне адбылося 21 лістапада каля 14.00. 11-гадовы хлопчык на прыпынку грамадскага транспарту чакаў маму. Нечакана да яго падбег сабака і ўкусіў хлопчыка за нагу. Побач апынулася гаспадыня сабакі. Яна не аказала дапамогі дзіцяці, а начапіла на сабаку ланцужок і напыснік ды заскочыла ў аўтобус.
Жанчына была абвешчаная ў вышук. Праваахоўнікі размясцілі ў інтэрнэце запіс з відэакамеры ў аўтобусе. Апазнаў жанчыну адзін з відавочцаў.
Выявілася, што гэта 30-гадовая жыхарка Брэста. Участковаму інспектару яна патлумачыла, што спалохалася адказнасці, таму і не звярнулася ў міліцыю.
Цяпер на яе склалі адміністрацыйныя пратаколы за выгул сабакі ў непрызначаным месцы і адсутнасць рэгістрацыі жывёлы. Таксама яе могуць прыцягнуць да адказнасці за парушэнне правілаў утрымання хатніх жывёл, што пацягнула прычыненне шкоды здароўю.
Ступень шкоды, нанесенай здароўю дзіцяці, вызначыць экспертыза.