Канфлікт у аўтамабільнай чарзе на мяжы: пешаход атрымаў пералом нагі

Канфлікт у аўтамабільнай чарзе на мяжы скончыўся пратаколамі ДАІ і шпіталізацыяй. Як паведамляе прэс-служба Гродзенскай абласной дзяржаўтаінспекцыі, інцыдэнт здарыўся ў пункце пропуску “Бераставіца”, што на беларуска-польскай мяжы.

Адзін з удзельнікаў канфлікту паспрабаваў загарадзіць дарогу свайму апаненту, які хацеў праехаць у чаргу праз турнікетную агароджу. Той усё адно паехаў і збіў пешахода, які атрымаў пералом нагі і звярнуўся па дапамогу да медыкаў.

За зробленае адкажуць абодва ўдзельнікі здарэння. Адзін — за здзяйсненне наезду, другі — за тое, што знаходзіўся на праезнай частцы.