Хлопца, які забіў сякерай каханую, асудзілі на 20 гадоў калоніі
Фота: usionline.com
Хлопец, які забіў сякерай каханую дзяўчыну, бліжэйшыя 20 гадоў правядзе за кратамі калоніі ўзмоцненага рэжыму. Такі прысуд 14 сакавіка абвясціў Гомельскі абласны суд, інфармуе БЕЛТА. Маладога чалавека прызналі вінаватым у забойстве, здзейсненым з асаблівай жорсткасцю.
Сама трагедыя адбылася 30 жніўня 2016 года. Дзяўчына была ў гасцях у свайго хлопца, і паміж імі пачалася сварка. Раз'юшаны юнак схапіў сякеру і не менш за 30 разоў стукнуў ёй дзяўчыну. Яна памерла ад атрыманых траўмаў.
Пасля забойства малады чалавек адправіў бацькам забітай і знаёмым СМС з тэкстам: "Насці больш няма".
У сваім апошнім слове гамяльчук папрасіў прабачэння ў родных: "Не ведаю, што на мяне знайшло. Даруйце мне, калі ласка. Яна мне сніцца дагэтуль".
Акрамя 20 гадоў у калоніі малады чалавек павінен выплаціць пацярпеламу боку маральную кампенсацыю ў 100 тысяч рублёў.
Дарэчы, суд вынес больш жорсткі прысуд, чым прасіла абвінавачанне. Пракурор прасіў прысудзіць яму 18 гадоў пазбаўлення волі. Бацькі забітай дзяўчыны настойвалі на 25 гадах пазбаўлення волі і па 50 тысяч рублёў кампенсацыі кожнаму.
Прысуд не набыў законную моц і можа быць абскарджаны або апратэставаны ў вызначаным законам парадку.