У Гомелі судзяць жанчыну, якая абліла міліцыянта кіпнем
Фота: news.vitebsk.cc
У Гомелі пачаўся суд над жанчынай, якую вінавацяць у гвалце супраць супрацоўніка міліцыі. Пацярпелым па справе праходзіць часовы выканаўца абавязкаў старшага ўчастковага інспектара АУС адміністрацыі Цэнтральнага раёна Гомеля.
Здарэнне адбылося ў верасні 2016 года, пішуць "Беларускія навіны". На судзе міліцыянт распавёў, што яго паслалі па выкліку ў кватэру грамадзянкі, якая прасіла дапамогі. Жанчына адчыніла дзверы пасля званку ў кватэру, але потым пачала паводзіць сябе агрэсіўна і крычаць, праганяючы міліцыянта.
Участковы паведаміў пра сітуацыю дзяжурнаму, і той паабяцаў выклікаць медбрыгаду. Тым часам жанчына адлучылася і вярнулася з каўшом кіпню ў руках. Яна прыгразіла, што абліе кіпнем міліцыянта. Ён паспрабаваў выбіць коўш з рук жанчыны, але тая паспела ударыць капітана і абварыць яго, пасля чаго зачыніла дзверы. Медыкі, якія прыбылі на месца здарэння, не змаглі трапіць у кватэру да жанчыны.
Пры здарэнні кіпень трапіў на твар міліцыянту. Як заявілі эксперты, у яго засталіся тэрмічныя апёкі першай ступені, якія адносяцца да цялесных пашкоджанняў, якія не прывялі да кароткачасовага разладу здароўя.
У судзе экспертыза засведчыла, што на момант злачынства жанчына была ў неадэкватным стане. Цяпер яна праходзіць курс лячэння, у судзе яе інтарэсы прадстаўляе сын.
Дарэчы, міліцыянт у судзе не патрабуе кампенсацыі маральнай шкоды.