У Шумілінскім раёне п’янаму лесарубу адарвала нагу прычэпам трактара

У Шумілінскім раёне мужчыне адарвала частку нагі прычэпам трактара. Як паведамляе БЕЛТА са спасылкай на прэс-службу Віцебскай абласной ДАІ, здарэнне адбылося ўвечары 16 снежня. 49-гадовы мужчына дапамагаў сваім пляменнікам нарыхтоўваць дровы для адной з прыватных арганізацый раёна. Пасля працы работнікі рушылі на месца начлегу, але пацярпелы не захацеў ехаць у кабіне трактара і палез у прычэп. Ён трапіў нагой у прывадны механізм прычэпа і застаўся без галёнкі.

Пляменнікі аказалі пацярпеламу першую дапамогу і каля трох кіламетраў неслі яго на руках да дарогі, дзе перадалі медыкам. Мужчыну даставілі ў лякарню, а медыкі паведамілі пра здарэнне ў міліцыю. Высветлілася, што падчас здарэння пацярпелы быў у нецвярозым стане.