Жыхар Рэчыцы ўгнаў аўто паводле "інструкцыі" ў інтэрнэце

19-гадовы жыхар Рэчыцы скраў машыну, каб праверыць праўдзівасць "інструкцыі", знойдзенай у інтэрнэце.

Як піша мясцовая газета "Дняпровец", першую спробу ён зрабіў 24 кастрычніка. Праўда, адразу ўгнаць ВАЗ-21043 ён не змог: уладальнік адключыў кантактную клему акумулятара.

А вось другая спроба 29 кастрычніка атрымалася ўдалай. Правярнуўшы замок, юнак скраў з неахоўнай стаянкі ВАЗ і паехаў катацца: ніякіх іншых ідэяў наконт аўто ў яго не было.

Тым часам уладальнік выявіў знікненне аўтамабіля і звярнуўся ў міліцыю. Неўзабаве міліцыянты і затрымалі ўгоншчыка.

Хлопец раней не прыцягваўся да крымінальнай адказнасці. Цяпер за ўгон аўто яму пагражае да пяцм гадоў абмежавання волі або пазбаўленне волі на той жа тэрмін.