У Расіі адбылася масавая бойка паліцэйскіх
Здымак з архіву. Фота: ria.ru
У Расіі адбылася масавая бойка паліцэйскіх. Здарылася гэта яшчэ тыдзень таму ў горадзе Калачынск Омскай вобласці на юбілеі аднаго з праваахоўнікаў. Як піша "Омск-Информ", паміж прысутнымі там паліцэйскімі ўзнік канфлікт, які перарос у бойку. Колькі дакладна ў ёй удзельнічала чалавек, невядома. Аднак на ўрачыстасць у сталовую прыйшло каля 60 праваахоўнікаў.
Адзначаецца, што бойка была такой, што хтосьці з прысутных выклікаў паліцэйскіх, якія былі на дзяжурстве. Разам з імі прыехаў і начальнік Калачынскага аддзела паліцыі Міхаіл Чамаданаў. Вядома пра шматлікіх збітых удзельнікаў адзначэння юбілею, пра паламаную мэблю і разбіты посуд. Пра прычыну бойкі таксама інфармацыі няма. Мясцовая паліцыя спрабавала схаваць здарэнне ад СМІ, што ёй і ўдавалася на працягу тыдня. Калі пра масавую бойку стала вядома, кіраўніцтва УМУС Расіі па Омскай вобласці прызначыла праверку.