У Жыткавіцкім раёне ў рацэ Скрыпіца масава загінула рыба

У Жыткавіцкім раёне Гомельскай вобласці ў рацэ Скрыпіца масава загінула рыба. Як паведаміла БЕЛТА прэс-сакратар Дзяржаўнай інспекцыі аховы жывёльнага і расліннага свету Вольга Грамовіч, дзяржінспектары знайшлі мёртвую рыбу са слядамі механічных пашкоджанняў (агулам — каля 500, пераважна карась і плотка). Гэта было ў месцы скіду вады з помпавай станцыі.

Высветлілася, што напярэдадні аператары адпампоўвалі ваду з меліярацыйных каналаў для правядзення дрэнажных работ. Падчас водазабору прылада для абароны рыбы адсутнічала. У адносінах парушальнікаў могуць распачаць крымінальную справу. Ім давядзецца кампенсаваць страты, нанесеныя прыродзе — 11,2 тысячы рублёў.