Асуджаны мужчына, які збіў работніка газавай службы за адмову з ім выпіць
Фота: Fotolia
У Століне прайшоў суд над мясцовым жыхаром, які збіў работніка газавай службы за адмову з ім выпіць. 45-гадовы мужчына атрымаў 240 гадзін грамадскіх работ, інфармуе БелаПАН.
Здарэнне адбылося ўдзень 27 ліпеня ў Століне. У дом згаданага мужчыны прыйшоў работнік вытворчага ўпраўлення "Пінскгаз" і паведаміў, што падчас праверкі ён выявіў на прылеглай да тэрыторыі прысядзібнага ўчастка трубе газаправоду карозію. Гаспадар знаходзіўся ў стане алкагольнага ап'янення. Ён заявіў, што пафарбуе трубу, і запрасіў работніка газавай службы выпіць. Калі той адмовіўся, мужчына некалькі разоў ударыў яго кулаком і парваў на ім працоўную куртку, ланцужок з крыжыкам і майку.
Пацярпелы паведаміў пра здарэнне ў міліцыю. Суд прызнаў мужчыну вінаватым у наўмысных дзеяннях, што груба парушаюць грамадскі парадак і выражаюць відавочную непавагу да грамадства, суправаджаюцца прымяненнем гвалту, пашкоджаннем і знішчэннем чужой маёмасці (ч. 1 арт. 339 КК). Ён прызнаў сваю віну і патлумачыў свае дзеянні крыўдай на работніка "Пінскгаза", які не захацеў раздзяліць з ім застолле. Яшчэ да разгляду справы ў судзе абвінавачаны кампенсаваў нанесены матэрыяльны ўрон пацярпеламу.
Прысуд яшчэ можа быць абскарджаны. Адзначаецца, што мужчына нідзе не працуе, раней судзімы не быў.