У Мінску пазадарожнік збіў хлопца, які выйшаў з трамвая (фота)
Фота: ДАІ Савецкага раёна Мінска
У ДТЗ на вуліцы Якуба Коласа ў Мінску пацярпеў малады чалавек, які выйшаў з трамвая, а таксама аўтамабіль, які яго збіў.
Як пішуць "Мінск-навіны" са спасылкай на ДАІ Савецкага раёна, здарэнне адбылося каля прыпынку "Вуліца Бялінскага". Трамвай спыніўся на прыпынку, і з яго на праезную частку выйшаў малады чалавек. Хлопец пабачыў, што ў другой паласе метраў за 40-50 едзе пазадарожнік "Нісан". Ён меркаваў, што аўтамабіль спыніцца, як гэтага патрабуюць Правілы дарожнага руху.
Аднак праз імгненне малады чалавек заўважыў, што "Нісан" не збіраецца спыняцца, а пераходзіць у першую паласу. Мінак разгубіўся, куды яму ісці, і спыніўся на дарозе. У гэты момант "Нісан" збіў яго.
Адразу пасля гэтага аўтамабіль выехаў з дарогі і ўрэзаўся ў ліхтарны слуп.
Пацярпелага з месца здарэння забрала хуткая. Паводле папярэдніх звестак, у юнака дыягнаставалі ўдары і чэрапна-мазгавую траўму.