Пад Лунінцам лакаматыў урэзаўся ў МАЗ з прычэпам (фота)
Фота: media-polesye.by
Каля 17-й гадзіны 24 ліпеня ў Лунінецкім раёне на чыгуначным пераездзе ў МАЗ з прычэпам урэзаўся лакаматыў. ДТЗ адбылося на чыгуначным пераездзе дарогі Бастынь — Вялута, піша media-polesye.by.
МАЗ перавозіў каля 20 тон збожжа. Падчас перасячэння дарожнага палатна ў грузавіку адмовілі тармазы.
Па словах інспектара ДПС Андрэя Ярмушэвіча, лакаматыў, які рухаўся без прычэпных вагонаў, урэзаўся акурат у месца счэпкі грузавіка з прычэпам. Ад удару машыну з кіроўцам у кабіне выкінула па адзін бок чыгуначнага пераезду, а прычэп перакуліўся на другі бок ад лакаматыва і перагарадзіў другую каляіну.
У ДАІ падкрэслілі, што прычэп выкарыстоўваўся без праходжання тэхнічнага агляду.
Аварыя паўплывала на графік руху цягнікоў. Дызель-цягнік Лунінец-Баранавічы адправіўся ў дарогу са спазненнем на 35 хвілін. А дызель-цягнік з Баранавічаў у Лунінец спазніўся на 20 хвілін.