Над Гродна пранеслася бура: за хвіліны дрэвы павыварочвала з карэннем (фота)

Над Гродна пранеслася моцная бура. Як піша выданне “Твой стыль”, гараджане параўноўваюць яе з тарнада. Навальніца са шквалістым ветрам прайшла па абедзе 17 чэрвеня. Усяго за некалькі хвілінаў ураган паламаў ледзь не кожнае другое дрэва ў цэнтры горада. У парк Жыліберу дрэвы паламала і павыварочвала з карэннем, пры універсітэце імя Янкі Купалы дрэвы пападалі на аўтастаянку, велапаркоўку і аўтобусны прыпынак.

Зараз у горадзе працуюць нарады ДАІ, брыгады хуткай дапамогі, ратавальнікі і міліцыя. Рух грамадскага транспарту спыняўся з-за пашкоджанняў на лініях электраперадач.

Непагода прыйшла ў Гродна з Польшчы: там сёння таксама пранесліся моцныя ўраганы, што прывяло нават да чалавечых ахвяраў.