Спыні імгненне
Інтэрактыўную карту помнікаў зробіць гродзенская моладзь.
У Гродне адбылася агульнагарадская акцыя «Спыні імгненне», у час якой мясцовыя фатографы зрабілі здымкі каля 300 гісторыка-культурных помнікаў.
За дзень да пачатку гэтага мерапрыемства яны зарэгістраваліся на старонцы «Варштат ідэй», якая была адкрыта на “Facebook”. Удзельнікі атрымалі карткі, дзе было акрэслена, якія аб’екты патрэбна сфатаграфаваць і з якога ракурсу.
У якасці падарунка арганізатары прыгатавалі для фатографаў экскурсію ў вежу Фарнага касцёла, дзе знаходзіцца найстарэйшы ў Еўропе гадзіннік.
Аўтары самых лепшых здымкаў атрымаюць прызы. Пераможцаў вызначаць па выніках інтэрнэт-галасавання.
Усе фота пасля апрацоўкі будуць скарыстаныя для стварэння віртуальнай карты Гродна. На ёй адзначаць гісторыка-культурныя помнікі горада з суправаджальнай інфармацыяй і здымкамі ў іх ранейшым і сучасным выглядзе.