"Фараон" не гарыць

За выхадныя дні ў Магілёўскай вобласці на пажарах у вёсках загінулі 4 чалавекі, а з пажарам у магілёўскім гульнявым клубе ўдалося справіцца без ахвяр.

У Бабруйскім раёне 25 лютага на пажары загінулі муж і жонка. Наведаць пенсіянераў у вёску Осава раніцай прыехаў іх сын, але ўбачыў пажар у хаце. Мужчына выцягнуў з агню сваю 80-гадовую маці, але жанчына ўжо не падавала прыкмет жыцця. Яе 71-гадовы муж таксама загінуў. Папярэдне Магілёўскае абласное ўпраўленне МНС паведаміла, што прычына пажару — неасцярожнасць пры курэнні.

У Хоцімскім раёне ў нядзелю 65-гадовая жанчына з вёскі Трасціно прымала гасцей, і вечарына зусім не была безалкагольнай. Гаспадыня з сынам ляглі адпачываць, а ўначы адбыўся пажар, у выніку людзі загінулі. Верагодная прычына тая ж — неасцярожнасць пры курэнні. 26 лютага сістэма аўтаматычнай пажарнай сігналізацыі "Маланка" спрацавала ў гульнявым клубе "Фараон" у цэнтры Магілёва на вуліцы Ленінскай. Пажар пачаўся ў падвальным памяшканні. 40 чалавек эвакуіравалі, ніхто не пацярпеў, маёмасць не пашкоджана. Мяркуецца, што прычынай стала кароткае замыканне.

Ілона Іванова.

Адбыўся пажар у інтэрнаце Полацкага каледжа ўстановы адукацыі "Віцебскі дзяржаўны ўніверсітэт імя Машэрава".

Як паведамілі ў Віцебскім абласным упраўленні па надзвычайных сітуацыях, супрацьпажарная сігналізацыя спрацавала а трэцяй гадзіне дня. Пажарнымі было ўстаноўлена, што адбылося кароткае замыканне пускавога рэле ў памяшканні агульнай кухні на другім паверсе будынка інтэрната. Да прыбыцця падраздзяленняў МНС супрацоўнікамі адміністрацыі інтэрната з паверха эвакуіравалі 15 навучэнцаў. Усяго на паверсе пражывае 28 чалавек. Пацярпелых няма.

Аляксандр ПУКШАНСКІ.