Жанчына трапіла ў калодзеж

Раніцай у вёсцы Надзвін Рэчыцкага раёна пенсіянерка трапіла ў калодзеж глыбінёй 5,5 метра. Пацярпелую да прыезду выратавальнікаў выцягнулі мясцовыя жыхары.

Як расказалі ў Цэнтры сацыялогіі і прапаганды бяспекі МНС, сусед жанчыны праходзіў побач, калі пачуў крык з калодзежа. Зазірнуў туды, убачыў, што пенсіянерка стаіць па шыю ў вадзе. Мужчына паклікаў на дапамогу дваіх аднавяскоўцаў, спусціўся ўніз па гаспадарчай вяроўцы, абвязаў ёй пацярпелую, і яны разам утраіх выцягнулі пенсіянерку з калодзежа. Пацярпелая была ў шокавым стане і прычыну свайго падзення патлумачыць не змагла. Як потым патлумачылі медыкі, жанчына была цвярозая. З дыягназам "агульнае пераахаладжэнне" яна знаходзіцца ў рэанімацыйным аддзяленні Рэчыцкай цэнтральнай раённай бальніцы.

Сяргей РАСОЛЬКА.

Папілі гарбаты...

Пры выбуху бытавога газу ў Светлагорску у сваім доме загінуў 81-гадовы мужчына. Яго 75-гадовую жонку ў гэты момант адкінула ўдарная хваля, і жанчына атрымала траўмы. Як расказалі ў прэс-службе ўпраўлення МНС па Гомельскай вобласці, пры распальванні газавай пліты пенсіянеры не заўважылі ўцечкі газу, што і прывяло да трагедыі. Агнём значна пашкоджаны дом з бярвення.

Ірына АСТАШКЕВІЧ, Сяргей РАСОЛЬКА.

Беларусы не адгукнуліся на заклікі апазіцыі прыйсці на "Народны сход"

У Мінску на "Народны сход", які склікала апазіцыя, прыйшлі каля 200 чалавек, улічваючы журналістаў, перадае БЕЛТА.

Паназіраць за акцыяй прыйшлі супрацоўнікі як беларускіх масмедыя, так і журналісты з Германіі, Польшчы, уласныя карэспандэнты СМІ іншых краін. Калі не ўлічваць колькасць карэспандэнтаў, то колькасць удзельнікаў несанкцыянаванай акцыі — каля 150 чалавек. Прыкладна палова прысутных проста стаяла пад парасонамі пад дажджом. Толькі невялікая група часам скандзіравала лозунгі.