З кавярні эвакуіравалі каля 100 чалавек

Арыштаваны наведнік віцебскай кавярні "Тэатральнай", які паведаміў прадстаўніку адміністрацыі, што закладзеныя ім 2,2 кг тратылу неўзабаве выбухнуць.

Як паведаміў "Звяздзе" пракурор Кастрычніцкага раёна горада Віцебска Уладзімір Шалухін, гэта было а трэцяй гадзіне ночы. Супрацоўнікі кавярні адразу прынялі ўсе неабходныя меры па эвакуацыі наведвальнікаў і персаналу. Сапёры пасля карпатлівых пошукаў выбуховых рэчываў нічога не знайшлі. Кліент, які паведаміў пра тратыл, арыштаваны. У дачыненні да яго заведзена крымінальная справа. Высветлілася, што ён знаходзіўся ў нецвярозым стане. Мужчына за свае дзеянні можа быць пазбаўлены волі тэрмінам да пяці гадоў.