Прычына пажару ў інтэрнаце — электраплітка

Каля 15 гадзін выратавальнікам Салігорскага раёна паступіла паведамленне пра пажар у цагляным будынку дзевяціпавярховага інтэрната №55 ААТ "Беларуськалій". Каб прадухіліць пагрозу жыццю і здароў'ю людзей, па лесвічных маршах з пятага паверха эвакуявалі 13 чалавек. Пажар быў лакалізаваны і ліквідаваны за лічаныя хвіліны. Пацярпелых не было. Прычынай здарэння стала ўключаная і пакінутая без нагляду электраплітка. Сяргей РАСОЛЬКА. 　 Падпаліў і сам атруціўся? Дом з бярвення ў адным з раёнаў Гомеля загарэўся бліжэй да ночы. Яго 69-гадовы гаспадар падчас пажару знаходзіўся ў суседнім двары. Як паведамілі ў прэс-службе Гомельскага абласнога ўпраўлення МНС, калі выратавальнікі яшчэ тушылі пажар, да медыкаў, якія таксама прыбылі на месца здарэння, па дапамогу звярнуўся 38-гадовы мужчына. Гэтага грамадзяніна з дыягназам "атручэнне прадуктамі гарэння" шпіталізавалі ў бальніцу. дом пенсіянера і прыбудова да яго знішчаны цалкам. Ірына АСТАШКЕВІЧ.