Ён схаваўся ў памяшканні банка і дачакаўся 17 гадзіны, пакуль тры касіркі не закрылі аддзяленне, а пасля напаў на іх. Дзвюх касірак ён закрыў у банкаўскай прыбіральні, але ў іх атрымалася звязацца з дзяжурным пультам. Міліцыя прыбыла літаральна праз хвіліну, і рабаўнік, які зразумеў, што іншага выйсця ў яго няма, здаўся сам. Па словах аператыўнікаў, ён паклаў грошы назад у сейф, і сам лёг на падлогу, склаўшы рукі за спінай. Маску і пальчаткі ён зняў.
Няўдалая здабыча рабаўніка павінна была скласці 650 мільёнаў беларускіх рублёў, 37 тысяч даляраў, 29 тысяч еўра і 750 тысяч расійскіх рублёў.Пра самога злачынцу вядома, што ён беспрацоўны і несудзімы, пражываў недалёка ад банка і выбраў менавіта гэты банк, бо ў ім адсутнічае сістэма відэаназірання. На сябе ён апрануў джынсы і кашулю, а пад іх майку і шорты — калі б ягоны план здзейсніўся, апазнаць яго на вуліцы было б немагчыма. Супрацоўнікі банка адмаўляюцца каментаваць здарэнне — звязацца з пацярпелымі касіркамі таксама немагчыма, вядома толькі тое, што адна з іх цяжарная, і пасля перанесенага шоку была адпраўлена ў радзільню. Як паведаміў нам кіраўнік групы інфармацыі і грамадскіх сувязяў Дэпартаменту аховы МУС Аляксандр Герасімаў па Беларусі праверана на прадмет сістэмы аховы 790 пунктаў абмену, праверку прайшлі ўсе — праца ніводнага пункту не прыпынена. Але ў 30 працэнтах пунктаў абмену адсутнічае відэаназіранне, 21 працэнт не здаецца на ахову падчас перапынкаў, а ў 20 працэнтах няма «трывожных» кнопак. Таксама трэба зазначыць, што такі выпадак для Беларусі — рэдкасць, часцей за ўсё рабуюць банкаматы, а ў мінулым годзе быў усплёск абрабаванняў абменных пунктаў.
Юрась Ускоў