Моцная спёка негатыўна адбілася на стане аварыйнасці на беларускіх дарогах
Пра гэта паведамілі ва ўпраўленні Дзяржаўтаінспекцыі МУС,
назваўшы мінулыя выхадныя цяжкімі.На стане аварыйнасці істотна адбілася гарачыня. Яна прыводзіць да страты кіроўцамі пільнасці, павышэння стамляльнасці і зніжэння ўвагі. Сярод прычын ДТЗ — невыкананне хуткасных рэжымаў, п’янства за рулём. За кіраванне транспартнымі сродкамі ў стане алкагольнага ап’янення ў мінулыя выхадныя былі затрыманы 673 чалавекі. Па віне п’яных кіроўцаў адбыліся два ДТЗ з пацярпелымі.
Самая «напружаная» абстаноўка на дарогах краіны была ў суботу, 12 чэрвеня. Адбыліся 32 ДТЗ, у якіх 10 чалавек загінулі і 40 былі траўмаваныя.
Самае буйное ДТЗ адбылося, як паведамлялася, раніцай 12 чэрвеня паблізу Лагойска. Паводле інфармацыі УДАІ МУС, пенсіянер 1949 года нараджэння, кіруючы »Фальксвагенам», выехаў на паласу сустрэчнага руху і па датычнай зачапіў »БМВ». За рулём гэтай машыны знаходзіўся жыхар Мінска 1958 года нараджэння. »БМВ», у сваю чаргу, сутыкнулася з аўтамабілем «Івека», які рухаўся ў сустрэчным напрамку. У выніку ДТЗ вкіроўца »БМВ», яго жонка 1960 года нараджэння, дачка 1982 года нараджэння, унучка 2005 года нараджэння загінулі на месцы, а сын 1988 года нараджэння, інвалід першай групы быў змешчаны ў бальніцу, дзе памёр 13 чэрвеня.
«Фальксваген» быў «абуты» ў зімовую рызіну (гуму — для знаўцаў мовы), што недапушчальна пры значнай тэмпературы паветра і дарожнага палатна.Апошняя 12 чэрвеня на ўчастку ДТЗ дасягала 47°С. Ад удару з «БМВ» на «Фальсвагене» сарвала пакрышку, аднак кіроўца ўмудрыўся праехаць на дыску прыкладна 300 метраў перш чым спыніўся.
Па факце ДТЗ пад Лагойскам распачата крымінальная справа, на месца здарэння выязджала следча‑аператыўная група МУС.
Вячаслаў Будкевіч, БелаПАН.