Амаль 4 кіло небяспекі
У Мінску затрыманы дзялок з буйной партыяй псіхатропу GWH-018
27-гадовы жыхар Гродна, паводле звестак прэс-афіцэра Маскоўскага РУУС Таццяны Грыб, прывозіў небяспечнае псіхатропнае рэчыва з Расіі на ўласным аўтамабілі і рэалізоўваў у Мінску. Затрымалі яго каля гандлёвага дома "Карона", калі "бізнэсмен" спрабаваў збыць чарговую партыю "дурману" ў колькасці 3 кілаграмы 860 грамаў.
Як выявілася, небяспечнае псіхатропнае рэчыва, якое ўваходзіць у склад курыльных сумесяў тыпу "спайс", затрыманы рэалізоўваў праз пастаянных аптовых пакупнікоў, якія за 1 кіло гэтай дрэні плацілі ў сярэднім каля 3 тысяч долараў ЗША. Між іншым, некаторыя з аптавікоў, што "працавалі" з наркадзялком, ужо затрыманыя і прыцягнутыя да крымінальнай адказнасці. Заганным "бізнэсам" раней не судзімы жыхар Гродна займаўся на працягу трох месяцаў, а за выручаныя грошы набываў каштоўныя рэчы — аўтамабіль 2007 года выпуску, прафесійны фотаапарат, ноўтбук, мабільныя тэлефоны і інш.
Ігар ГРЫШЫН.
Конь у калодзежыУ Добрушы конь трапіў у калодзеж, які будаваўся побач з домам. Гаспадар патэлефанаваў выратавальнікам, якія прыехалі са спецтэхнікай. Менш за гадзіну жывёліна сядзела ў бетоннай пастцы глыбінёй 2,5 метра. Спецыялісты МНС падвялі пад каня спецыяльны ручнік для выцягвання жывёлы, бо звычайныя вяроўкі могуць пераціснуць цела. Потым, з дапамогай аўтакрана КУП "Добрушскі камунальнік", непашкоджанага гнядога паднялі з калодзежа.
Ірына АСТАШКЕВІЧ.