Ні агароджы, ні мільёнаў
Адзін прадпрымальны махляр у Брэсце ўзяўся падманваць пажылых людзей, што жывуць у прыватным сектары. Ён абяцаў зрабіць агароджу вакол дома альбо ўчастка. Але грошы браў наперад.
У адной пенсіянеркі гора-прадпрымальнік узяў каля двух з паловай мільёнаў рублёў, у другой — 13 000 рублёў, у трэцяга гаспадара — 2 мільёны рублёў. Але абяцанай агароджы домаўладальнікі не дачакаліся і пайшлі ў міліцыю. Зламыснік затрыманы.
Яна СВЕТАВА.
Вучыць сынаНа меліярацыйным канале каля в. Печкі ў Маларыцкім раёне невядомыя разабралі механізмы і выкралі металічныя часткі шлюза.
Пра гэта заявіў у міліцыю дырэктар УП "Маларыцкае ПМС". Аператыўная група ўстанавіла, што такім чынам вырашыў падзарабіць трактарыст з мясцовага сельгаскааператыва. Ён разам з сынам-вучнем скраў тыя дэталі.
Сымон Свістуновіч.
Тэлевізар — прычына пажаруУ Чашніках стары тэлевізар маркі "Рубін", выраблены ў 1958 годзе, стаў прычынай пажару у драўляным доме пенсіянеркі 1915 года нараджэння.
Як паведаміла "Звяздзе" прэс-сакратар Віцебскага абласнога ўпраўлення па надзвычайных сітуацыях Марына Фандо, пенсіянерку пажарныя выратавалі. Медык канстатавала, што медыцынская дапамога гаспадыні дома не патрэбна. Магчымая прычына пажару — кароткае замыканне тэлевізара. У выніку пажару была пашкоджана маёмасць у доме на суму 1 мільён рублёў.
Аляксандр ПУКШАНСКІ.
Праз сцяну... да гарэлкіДвое беспрацоўных з Брэста вырашылі абрабаваць краму Брэсцкай спажыўкааперацыі па вул. Прыгранічнай. Яны не адключалі сігналізацыю і не пілавалі краты на вокнах, а залезлі ў краму праз сцяну. Напачатку сарвалі замок з дзвярэй кацельні, а затым спакойна ўзяліся ламаць сцяну крамы.
Зладзеі ўсю ўвагу сканцэнтравалі на алкаголі і цыгарэтах. Украдзенае пацягнула на 3 млн рублёў. Зладзеяў чакае суд.
Сымон Свістуновіч.