З Дома культуры эвакуявалі 500 чалавек

Каля трох гадзін ночы невядомы "замініраваў" будынак гарадскога Дома культуры ў Барысаве, патэлефанаваўшы ў міліцыю.  

 

Нягледзячы на такі позні час, паведамілі ў аддзяленні інфармацыі і грамадскіх сувязяў УУС Мінаблвыканкама, з Дома культуры праваахоўнікам прыйшлося тэрмінова эвакуяваць каля 500 чалавек — у будынку працавалі кавярня і начны клуб. Агледзеўшы ўсе памяшканні, сапёры не знайшлі ніякіх выбухованебяспечных прадметаў. Затое ёсць надзея, што невядомы "мінёр" будзе знойдзены.

Ігар ГРЫШЫН.

"Крот" за рулём Халаднаватай ноччу адна з груп затрымання сталічнага Ленінскага аддзела Дэпартамента аховы МУС заўважыла іншамарку, якая ехала па вуліцы Маякоўскага з выключанымі фарамі. Небяспечны тэхнічны сродак, падобны да сляпога кацяняці, шарахаўся ў розныя бакі.

Уключыўшы "мігалку", міліцыянеры прымусілі нябачнага пакуль "крата" спыніцца. Адганяючы рэзкі алкагольны "водар", які ішоў ад невядомага, ахоўнікі парадку пачалі правяраць у яго дакументы. У гэты час па службовай радыёстанцыі аб'явілі аперацыю "Перахоп" у сувязі з крадзяжом легкавушкі. Пачуўшы яе апісанне, супрацоўнікі аховы ў думках падзякавалі Фартуне — якраз скрадзены аўтамабіль яны і спынілі...

Малады мужчына, які ўжо адбываў раней пакаранне, ад пошуку прыгодаў на ўласную галаву і не падумаў адмаўляцца. Нават пасля добрай выпіўкі ён не змог абыякава прайсці міма пакінутай двума прыяцелямі, якія зайшлі ў кавярню, машыны. У сваёй кішэні ён насіў вялікую звязку розных аўтамабільных ключоў...

Анатоль КАНСТАНЦІНАЎ.

На лаўцоў і звер бяжыць Зладзеі-кішэннікі аблюбавалі аўтобусны маршрут №7 у Баранавічах і чысцілі там сумкі і кішэні пасажыраў.

Аператыўнікі вырашылі таксама папрацаваць на аўтобусах гэтага маршруту і не пашкадавалі. У адным з аўтобусаў міліцыянеры схапілі за руку злодзея. Ён выцягнуў у жанчыны з сумкі кашалёк і выйшаў з аўтобуса. Тут кішэнніка і ўзялі.

25-гадовы гараджанін аказаўся рэцыдывістам і толькі паўтара месяца як выйшаў на волю.

Сымон Свістуновіч.