Кава папярэджвае інсульт у жанчын?

Швецкія навукоўцы выявілі, што рэгулярнае ўжыванне кавы змяншае верагоднасць развіцця інсульту ў жанчын, паведамляе Medіcal News Today.

Даследчыкі з Каралінскага інстытута ў Стакгольме прааналізавалі звесткі 34 670 жанчын, якія прынялі ўдзел у больш як дзесяцігадовым эпідэміялагічным даследаванні ўзаемасувязі дыеты, ладу жыцця і развіцця захворванняў Swedіsh Mammography Cohort, распачатым у 1997 годзе. На момант пачатку даследавання ва ўдзельніц, узрост якіх складаў ад 49 да 83 гадоў, не назіралася прыкмет захворванняў сардэчна-сасудзістай сістэмы. За час назірання ў 1680 жанчын адбыўся інсульт. Пасля ўводзін паправак на такія фактары рызыкі, як залішняя вага, тытунекурэнне, цукровы дыябет, артэрыяльная гіпертэнзія і прыём алкаголю, высветлілася, што рэгулярнае ўжыванне кавы змяншае рызыку гэтага захворвання. У прыватнасці, паводле інфармацыі даследчыкаў, сярод жанчын, якія выпівалі не менш чым адзін кубак кавы ў дзень, інсульты назіраліся на 22-25 адсоткаў радзей, чым у астатніх. Ужыванне менш чым адзін кубак напою штодня на рызыку развіцця захворвання не ўплывала. Даследаванні, праведзеныя ў розных краінах раней, паказалі, што кава змяншае рызыку дыябету і арытмій, а таксама ўмацоўвае гематаэнцэфалічны бар'ер і дапамагае аднавіць мышцы пасля нагрузак. Аднак калі ўжываць больш за адзін кубак кавы штодня, то гэта можа негатыўна адбіцца на працяканні цяжарнасці.