Арэхі палепшаць памяць

Аказваецца, арэхі зніжаюць рызыку ўзнікнення старэчай няпамятлівасці і раптоўнага інфаркту, бо вітамін Е, які ўтрымліваецца ў арэхах, перашкаджае ўтварэнню халестэрынавых бляшак і ахоўвае сасуды. Прычым лепшым варыянтам з"яўляецца міндаль.

Акрамя таго, людзі, якія не радзей за два разы на тыдзень з"ядаюць 30 грамаў арэхаў, зніжаюць рызыку інфаркту на 47 % у параўнанні з тымі, хто ўвогуле не есць арэхаў. Больш за тое, розныя гатункі арэхаў дапамогуць вам пазбавіцца ад розных немачаў.

Напрыклад, фундук можна лічыць улюбёнцам дыетолагаў: дзякуючы нізкаму ўтрыманню вугляводаў яго можна есці і пры вельмі строгай дыеце без рызыкі набраць вагу. Фундук карысны пры хранічнай стомленасці, дыябеце, павышаным ціску, павелічэнні прастаты, варыкозным расшырэнні і запаленні вен.

Малачко з лясных арэхаў супакойвае нервы і лечыць хранічныя бранхіты. Гатуецца яно так: 50 ядраў арэхаў раскалоць і замачыць на 10 гадзін у адной шклянцы цёплай вады. Затым расцерці ў ступцы і настойваць на працягу трох гадзін, закіпяціць і працадзіць. Дадаць 5 сталовых лыжак вяршкоў і 2 дэсертныя лыжкі мёду. Прымаць па сталовай лыжцы два разы на дзень перад ядой.

Міндаль лічыцца чэмпіёнам па ўтрыманні кальцыю і вітаміну Е. Ён вельмі карысны пры малакроўі і парушэннях зроку, а міндальны алей дабратворна дзейнічае на скуру, увільгатняючы яе і здымаючы раздражненне. Пры захворваннях страўнікава-кішачнага тракту і нырак рэкамендуецца есці міндальныя арэхі, запіваючы іх гарачым малаком. Салодкі міндаль карысны пры павышаным узроўні халестэрыну, пры гіпертаніі, пухлінных захворваннях, вочных хваробах, атлусценні, язвах, хваробах жоўцевых пратокаў і пякотцы. А вось горкім міндалём празмерна захапляцца не варта — вельмі вялікая колькасць эфірных алеяў, якія ўтрымліваюцца ў гэтым гатунку арэха, можа нанесці шкоду здароўю. Дапушчальная дзённая норма — усяго некалькі зярнятак.

Арахіс, або як яго яшчэ называюць, земляны арэх, — цудоўная крыніца фоліевай кіслаты, якая садзейнічае абнаўленню клетак, а тлушчы, што ўтрымліваюцца ў ім, аказваюць лёгкае жаўцягоннае дзеянне. Арахіс паляпшае памяць і ўвагу, садзейнічае нармальнаму функцыянаванню нервовай сістэмы, сэрца і іншых унутраных органаў. Аднак неабсмажаны арэх можа выклікаць парушэнні стрававання, а скурка арахісу — моцную алергію, таму лепш есці смажаныя і ачышчаныя арэхі.

Фісташкі карысныя тым, хто ачуньвае пасля хваробы, а таксама пры захворваннях печані, млоснасці і ў якасці прафілактыкі праблем з сэрцам. Выбіраючы фісташкі, варта памятаць пра тое, што зялёны колер ядзерцаў сведчыць пра спеласць: чым яны зелянейшыя, тым смачнейшыя.

Грэцкія арэхі ў многіх народаў лічыліся ежай волатаў — яны сапраўды ўмацоўваюць мышцы і хутка здымаюць стомленасць пасля фізічнай нагрузкі. Акрамя таго, плады грэцкага арэха аказваюць бактэрыцыднае, агульнаўмацавальнае, супрацьзапаленчае дзеянне.