Выязны раённы семінар Нясвіжскага РЦК “Арганізацыя мерапрыемстваў па фарміраванні духоўнага і маральнага развіцця дзяцей і падлеткаў на традыцыях народнай культуры з выкарыстаннем новых форм і метадаў клубнай работы” для работнікаў устаноў культуры прайшоў на базе Карцэвіцкага СДК.
Каля ганка гасцей — работнікаў устаноў культуры раёна — сустракаў вядучы Несцерка (Павел Крыварот), апрануты ў падпярэзаную кашулю, быццам сапраўдны гаспадар. з хлебам-соллю маленькія ўдзельнікі аматарскай творчасці запрашалі ўсіх прайсці ў “Скарбніцу роднай мовы” — першую лакацыю дзеянняў. Тут работнікі культуры праверылі свае веды прыказак з прымаўкамі пра хлеб і беларускую кухню, пранікліся мастацкім чытаннем вершаў. Урывак з рамана Ніла Гілевіча “Родныя дзеці” прадставіла Таццяна Гаціла, верш пра аладкі невядомага аўтара прачытала Дар’я Цвірко, творы Пімена Панчанкі прадэманстравалі Анастасія Фірысюк і Уладзіслаў Гегеня. Скончылася паэтычная імпрэза сапраўдным гімнам беларускай народнай кухні, кулiнарным адступленнем з паэмы “Родныя дзеці” цудоўнага беларускага паэта Ніла Гілевіча, якое зачытала таленавітая вядучая “Скарбніцы” Ірына Крыварот.
Малёўскі фальклорны гурт
У другой лакацыі — “Фальклорнай скарбонцы” — наведвальнікаў чакала тэатралізаваная вечарына “Без мінулага — няма будучыні”, дзе на прыгожай беларускай мове дзеці размаўлялі з гледачамі, паказвалі інсцэніроўкі, танцавалі і падпявалі аматарскаму аб’яднанню “Малёўскі фальклорны гурт”, адну з песень якога з задавальненнем дапамагалі спяваць і госці ў сваеасаблівым караоке-фармаце.
І ў апошняй лакацыі — “Куфэрку талентаў” — прайшоў першы вясковы фестываль беларускай песні “Блакітны васілёк”, які, спадзяёмся, стане традыцыйным. Як расказвалі гледачам вядучыя, кветка васілёк такая ж сціплая, простая і адкрытая, гасцінная і талерантная, як і беларускі народ, таму з цягам часу ператварылася ў са-праўдны сімвал беларускай зямлі.
Перад гасцямі выступае
Уладзіслаў Гегеня
Музычныя нумары прадставілі Кацярына Мовчан, Анастасія Куніцына, Таццяна Гаціла, Аліна Гегеня, Крысціна Якавец, Людміла Дзерачыц, Дзіяна Крыўко, дзіцячая вакальная група “Дамісолька” і сярэдняя вакальная група. Кожны выступоўца атрымаў імянную грамату Нясвіжскага раённага цэнтра культуры за папулярызацыю песеннай спадчыны беларускага народа, захаванне традыцый і любоў да роднай мовы, а дыпломам першага вясковага фестывалю “Блакітны васілёк” была ўзнагароджана дзіцячая вакальная група “Дамісолька”. За арганізацыю і правядзенне семінара граматай РЦК адзначана загадчык Карцэвіцкага СДК Марына Шумейка.
Традыцыйны хлеб-соль для ўдзельнікаў семінара прапаноўваюць Захар Крыварот і Соня Мовчан
Напрыканцы семінара падво-дзіліся вынікі мерапрыемства і разглядаліся тэмы наступных сустрэч. Работнікі ўстаноў культуры абмяркоўвалі, што можна пераняць з убачанага ўжо зараз, а да чаго трэба імкнуцца. Адзначаючы кампазіцыйную еднасць, адкрытасць дзяцей, іх паводзіны на сцэне, выверанасць рухаў і плаўнасць пераходаў, госці з павагай гаварылі аб тым, якая карпатлівая работа была праведзена і колькі ўвагі да дэталяў нададзена пры падрыхтоўцы. Але загадчыку Карцэвіцкага СДК Марыне Шумейка хацелася пачуць і крытыку: “Тое, што добра, мы і так ведаем. Скажыце, якія недахопы, каб у наступны раз іх не паўтарыць”. Такі настрой падштурхнуў удзель-нікаў семінара больш пільна паглядзець і на сваю працу, падумаць, што можна палепшыць і як. Работнікі культуры не только з карысцю правялі час, але і адклалі цікавыя ідэі ў скарбонку памяці, каб аднойчы іх рэалізаваць.
Неаніла ЛЮБАНЕЦ.