У Германавічах прайшоў семінар бібліятэчных работнікаў раёна

дырэктар Шаркаўшчынскай ЦБС А. Ц. Фромертас (справа) узнагароджвае бібліятэкара Т. Г. Хоміч

У кожнага з нас свая малая радзіма, тое месца, дзе з’явіўся на свет, зрабіў першыя крокі, свядома абраў сваю жыццёвую дарогу. Гэтай тэме быў прысвечаны семінар бібліятэчных работнікаў раёна, які адбыўся ў сакавіку на базе Германавіцкай бібліятэкі-філіяла № 13 і меў назву “Роднаму краю — часцінку душы прысвячаю”. Адметным стала і тое, што Германавіцкая бібліятэка ў гэтым годзе адзначае 100-гадовы юбілей. Акрамя супрацоўнікаў Шаркаўшчынскай ЦБС на семінар былі запрошаны і мясцовыя жыхары: былы бібліятэкар Германавіцкай бібліятэкі Ірына Віктараўна Абламава, мясцовы краязнаўца Кліменцій Арсеньевіч Кожан і былы настаўнік Германавіцкай сярэдняй школы Іван Аўгусцінавіч Мядзелец.

У пачатку семінара бібліятэкару Таццяне Генадзьеўне Хоміч быў уручаны дыплом за актыўную работу па папулярызацыі роднай мовы, краязнаўства і ў сувязі з юбілеем бібліятэкі.

Кліменцій Арсеньевіч Кожан у сваім далёкім дзяцінстве бачыў Язэпа Драздовіча. Ён расказаў пра асобу мастака і этнографа, затым асобна спыніўся на гісторыі стварэння і дзейнасці культурна-асветніцкага таварыства “Заранка” ў 1919 годзе, бо менавіта тады была заснавана бібліятэка з ахвяраваных выданняў, і падтрымлівалася яна на сродкі таварыства.

Прадоўжыла размову былы бібліятэкар Ірына Віктараўна Абламава, якая ўспомніла гады сваёй працоўнай дзейнасці, павіншавала з юбілеем і падарыла Таццяне Генадзьеўне памятны сувенір.

Кульмінацыйным момантам семінара стала прэзентацыя кнігі Івана Аўгусцінавіча Мядзельца “Я люблю тебя, Ельня! Непутевые заметки экотуриста”. Іван Аўгусцінавіч — чалавек, які за сваё жыццё абышоў мясцовае балота ўздоўж і ўпоперак, пабываў на берагах усіх азёр, вывучыў раслінны і жывёльны свет. Ён цікава прадставіў прысутным сваю кнігу, а затым правёў займальную віктарыну.

У Год малой радзімы тэма краязнаўства з’яўляецца вельмі актуальнай, з яе дапамогай можна пашырыць свае веды пра родны край, пазнаёміцца з яго гісторыяй, славутымі землякамі, літаратурным краязнаўствам і культурнай спадчынай.

А. АНДРЭЕВА,

бібліятэкар аддзела бібліятэчнага маркетынгу ЦБС.