З легендаў і казак былых пакаленняў

21 лютага, у Міжнародны дзень роднай мовы, людзі па ўсім свеце размаўляюць так, як іх вучылі ў дзяцінстве. І робяць тым самым няхай і невялічкі, але значны крок да захавання моўнай разнастайнасці.

У яслях-садзе № 10 “Расінка” гэтаму святу прысвяцілі цэлы тыдзень, насычаны яркімі і цікавымі мерапрыемствамі. Разам з выхавацелямі дзеці чыталі беларускамоўныя кнігі, удзельнічалі ў конкурсе чытальнікаў і малюнкаў, правялі інсцэніроўку народнага свята, бліжэй пазнаёміліся з традыцыйнымі промысламі — саломапляценнем і ганчарствам, а таксама з народнай беларускай вопраткай, здзейснілі экскурсію ў міні-музей беларускага мастацтва, дзе пабачылі побытавыя рэчы. На занятках па дэкаратыўным маляванні выхаванцы практыкаваліся ў стварэнні нацыянальнага ўзору, пашыралі веды пра яго элементы і каляровую гаму. Словам, цікава было і дзецям, і дарослым.

А вось у садку № 8 “Чабурашка” запрасілі матчына слова да сябе.

— У рамках Тыдня беларускай мовы адбылася сустрэча з паэтэсай Лёляй Багдановіч, — расказала намеснік загадчыка па асноўнай дзейнасці Святлана Нікалаенка. — На мерапрыемства паклікалі дзяцей са старэйшых груп “Елачка” і “Зорачка”. Лёля Уладзіміраўна расказала пра сябе, прыгадала некалькі цікавых гісторый з жыцця, чытала шмат вершаў. Дзеці з задавальненнем слухалі казкі зямлячкі, адгадвалі аўтарскія загадкі. Знайшлося месца і для сюрпрызу. Паэтка прыемна здзівілася, што нашы выхаванцы знаёмыя з яе творчасцю: Усевалад Маісееў і Валерыя Дзмітрук чыталі вершы, хутка складалі загадкі. Напрыканцы сустрэчы аўтарка пазнаёміла дзетак са сваімі кнігамі і зрабіла падарунак — зборнік вершаў “Вясёлкавы масток”.

Фота Зміцера КАЛЯДЫ.

Алена Шычко разам з выхаванцамі «Расінкі» Міланай Трыбушэўскай

і Раманам Кіршанковым чытае кнігу на роднай мове