У Астраўцы працуе выстава: партрэты Вялікіх князёў Альгерда, Кейстута і Вітаўта напісаныя на дрэве
У панядзелак, 8 красавіка, у будынку дзіцячай школы мастацтваў адбылося адкрыццё выставы мінскага мастака Алеся Сушы пад назвай “Напрадвесні”.
Гэта манументальныя алейныя краявіды старажытнай Нальшчаншчыны, якія Алесь стварыў на працягу апошніх гадоў у Крэве і Кабыльніку.
Партрэты вядомых асоб Беларусі – Вялікіх князёў Альгерда, Кейстута і Вітаўта, магната Януша Радзівіла, паэткі Алаізы Пашкевіч (Цёткі), нацыянальнага героя Кастуся Каліноўскага, напісаных на дрэве. Ну і вядома ж, візітоўка Сушы, – салонныя дзяўчынкі, выкананыя пастэльнымі фарбамі.
Ініцыятарам мастацкай выставы выступіў Астравецкі краязнаўчы музей на чале з дырэктарам Ганнай Кацуба. Адкрыў імпрэзу намеснік старшыні Астравецкага райвыканкама Віктар Свіла.
Сваімі ўспамінамі пра пленэр, які адбыўся ў 2007 годзе на Астравеччыне і быў прысвечаны 100-гадоваму юбілею мастака з Лошы Льву Дабжынскаму, а таксама ўражаннямі пра выставу з прысутнымі падзяліліся сябры і калегі па творчым цэху – краязнаўца Алесь Юркойць, скульптар Сяргей Гумілеўскі, мастакі Тэрэса Варановіч, Алесь Буйвідовіч, Людміла Кухарэвіч і Стафан Казлоўскі.
Завяршыў імпрэзу госць з Літвы – доктар гуманітарных навук, прафесар Эгідыюс Мажынтас, якога партрэты Альгерда і Кейстута натхнілі на згадку пра Вялікае Княства Літоўскае.
Спадар Мажынтас казаў, што менавіта протабеларускі этнас быў рухавіком магутнай еўрапейскай дзяржавы, а жамойты, дзякуючы нам, ліцвінам, здолелі выстаяць перад крыжацкай навалай.
Згодна з прагнозамі сіноптыкаў, да прыходу на Беларусь цёплага надвор’я засталіся два тыдні. Напрадвесні музей запрашае на выставу, якая будзе працаваць да 19 красавіка.
Тадэвуш НАЛЬШЧАНСКІ.
Фота google.by