У бальніцы ў адной палаце ляжаць адразу два народныя артысты. Гарбук і Лучанок сталі ахвярамі галалёду

У бальніцы ў адной палаце ляжаць адразу два народныя артысты. Гарбук і Лучанок сталі ахвярамі галалёду

Знакаміты акцёр Генадзь Гарбук і вядомы кампазітар Ігар Лучанок сталі ахвярамі галалёду.

Як стала вядома “Народнай Волі”, народны артыст СССР Ігар Лучанок і народны артыст Беларусі Генадзь Гарбук зараз знаходзяцца ў адной палаце хірургічнага аддзялення Рэспубліканскага клінічнага медыцынскага цэнтра. Медыкі не паведамляюць падрабязнасцяў, але вядома, што абодва мужчыны патрапілі ў бальніцу з-за падзенняў. Зараз яны адчуваюць сябе больш-менш нармальна, і сваякам дазволена іх наведваць.

Нагадаем, што Генадзь Гарбук нарадзіўся 24 ліпеня 1934 году ў вёсцы Глыбочка Ушацкага раёна Віцебскай вобласці. У 1958 годзе скончыў Беларускі тэатральна-мастацкі інстытут, а з 1962 года - акцёр Нацыянальнага акадэмічнага тэатра імя Янкі Купалы.

Ігару Лучанку зараз 74 гады. Ён стаў аўтарам шматлікіх папулярных песень для беларускіх і замежных выканаўцаў. З 1980 года ўзначальвае Саюз кампазітараў Беларусі.