На фолк-фэст "Камяніца" прыедзе "Іван Купала"

 

Гурт "Іван Купала" з хітамі "Кострома" і "Коляда" пры канцы 90-х здзейсніў сапраўдную рэвалюцыю на постсавецкай музычнай сцэне, спалучыўшы электронныя аранжыраванні і карнявы фальклор. Але і пасля гэтага калектыў не стаяў на месцы - гэтым летам выйшаў трэці студыйны альбом "Купалы" пад назвай "Родина".

 

- У сваёй творчасці мы шмат выкарыстоўваем беларускія народныя песні - менавіта з іх большай часткай складаўся наш другі альбом "Радио Награ" (2002), таму запрашэнне з Мінска нас вельмі цешыць, - распавёў кіраўнік гурта Аляксей Румянцаў. - Новы альбом атрымаўся беларуска-ўкраінскім - мы працавалі з песнямі Палесся, у чым нам вельмі дапамагла вядомая фалькларыстка Зінаіда Мажэйка, якая жыве ў Мінску.

 

Фестываль у гэтым годзе будзе праходзіць з 12 да 21 гадзіны. На ім упершыню будзе працаваць сцэна аматарскіх калектываў. Гледачоў чакаюць традыцыйныя рамёствы, сярэднявечныя забавы, дэфіле і конкурс нацыянальных строяў, выставы фатографаў і мастакоў. Калі вы жадаеце ўзяць удзел у любым з гэтых напрамкаў, пішыце на адрас kamianicafest@gmail.com.

 

Месца правядзення - Музей народнай архітэктуры і побыту з пасёлку Азярцо (5 км за аўтарынак "Малінаўка"), дзе сярод маляўнічых лугоў можна пабачыць сабраныя з усёй Беларусі драўляныя дамы і іншыя пабудовы 18-20 стагоддзяў. Усе грошы за ўваход атрымлівае музей, што дапамагае яму захоўваць экспанаты. Фестываль адбудзецца пры падтрымцы ААТ "Банк БелВЭБ".